Thaçi: Serbia duhet të jap përgjigje e përgjegjësi për Ukshin Hotin

Presidenti i Kosovës Hashim Thaçi ka deklaruar se shteti i Serbisë duhet të jap përgjigje dhe përgjegjësi për rastin e veprimtarit kosovar Ukshin Hoti.

Ky reagim i presidentit ka ardhur pas transmetimit të disa pamjeve në emisionin “Udhëve” në RTK, të dokumenteve të Serbisë e që thuhet se tregojnë për fatin dhe vrasjen e Ukshin Hotit.

Ndërkaq, Thaçi është shprehur në Facebook se personaliteti i Ukshin Hotit është monument madhështor i ndërtuar nga filozofia politike dhe fuqia e fjalëve të tij.

“Ai mbeti deri në fund veprimtar i palëkundur i lëvizjes sonë kombëtare për liri e pavarësi. Me tërë qenien e tij ishte në shërbim të lirisë dhe dinjitetit njerëzor e kombëtar. Kosova ka mijëra qytetarë të pagjetur dhe shteti serb duhet të japë përgjigje e përgjegjësi për fatin e tyre. Duhet të japë përgjigje e përgjegjësi edhe për Ukshin Hotin!”, thuhet në publikimin e tij në Facebook.

Ndërkaq, Këshilli për Mbrojtjen e të Drejtave dhe Lirive të Njeriut, ka deklaruar se informatat për rastin e veprimtarit Ukshin Hoti duhet të vërtetohen.

Ndërkaq, sipas KMDLNj-së, në këtë emision janë paraqitur disa skica të vendit ku janë ekzekutuar disa persona në mesin e të cilëve supozohet të jetë edhe Ukshin Hoti.

Edhe Andin Hoti, i biri i shkrimtarit dhe veprimtarit të çështjes kombëtare, Ukshin Hoti, ka reaguar pas raportimit të Televizionit Publik.

Në reagimin e familjes Hoti është kërkuar që sa më parë institucionet e Kosovës të kërkojnë që çështja e gjetjes së trupit të Ukshin Hotit të ngritet edhe në dialogun Kosovë-Serbi.