Thaçi pranon demantimin që i bëri BE-ja për emërimin e Lajçak  

Presidenti i Kosovës Hashim Thaçi ka deklaruar se e ka mirëpritur reagimin e BE-së që e ka vërtetuar se ai e ka pasur gabim kur ka thënë se sllovaku Mirosav Lajçak është emëruar emisar për dialogun Kosovë-Serbisë.

Thaçi ka shtuar se argument i tij nuk ka pasur të bëjë me procedurat e brendshme por gabimet strategjike.

“E mirëpres që BE-ja e ka vërtetuar se jam gabim në pretendimin tim për emërimin e Lajçak. Kjo do të ishte në interesin e Kosovës dhe do të përmirësonte besueshmërinë e BE-së. Argumenti im nuk ka të bëjë me procedurat e brendshme, por gabimet strategjike. Sllovakia nuk e ka njohur Kosovën dhe votoi kundër nesh në UNESCO”, ka shkruar Thaci në Twitter.

Presidenti i Kosovës, Hashim Thaçi, një ditë më parë tha se Bashkimi Evropian edhe zyrtarisht e ka emëruar diplomatin sllovak Miroslav Lajçak si të dërguar special për dialogun Kosovë-Serbi, por një zyrtar nga BE-ja e ka mohuar këtë gjë.

Zëdhënësi i përfaqësuesit të lartë të BE-së për Politikë të Jashtme dhe Siguri, Josep Borrell, Peter Stano ka thënë se është i befasuar nga deklarata e pasaktë e presidentit Thaçi.

“I befasuar të shoh një deklaratë të tillë të gabuar dhe faktikisht të pasaktë, procedurat brenda BE-së janë duke vazhduar, asnjë vendim nuk është marrë, nuk është bërë asnjë emërim ose as nuk është shpallur, pasi të përfundojë procesi, ne do të njoftojmë zyrtarisht”. Ka shkruar Stano në Twitter.

Kurse, presidenti Thaçi ia parashikoi dështimin Lajçakut, pa ia përmendur emrin.

“BE emëroi zyrtarisht të Dërguarin Special për dialogun Kosovë-Serbi. E përgëzoj për punën e këndshme që mori. Por misioni i tij i ri është krijuar të dështojë për shkak të historisë së tij për të ndaluar Sllovakinë të njohë Kosovën dhe të votojë kundër Kosovës në UNESCO”, shkroi Thaçi në Twitter.

Bashkimi Evropian pritet të emërojë zyrtarisht një emisar të veçantë për bisedimet Kosovë-Serbi, si një angazhim të shtuar drejt rrugës për finalizim të një marrëveshjeje të mundshme ndërmjet të dyja shteteve.

Kohëve të fundit për këtë pozitë është përmendur se do të emërohet ministri i Jashtëm i Sllovakisë, Miroslav Lajçak, ndonëse një gjë e tillë ende nuk është konfirmuar zyrtarisht.