Thaçi në prag të shpalljes së gjendjes së jashtëzakonshme, kërkon që FSK të jetë në gatishmëri
Presidenti i vendit, Hashim Thaçi, ka pritur sot Komandantin e FSK-së, Gjeneral Lejtnant Rrahman Ramën, me të cilin ka biseduar për nivelin e gatishmërisë së FSK-së për të ndihmuar në përballje me rrethanat e krijuara nga përhapja e COVID-19.
Në bazë të situatës së krijuar pas përhapjes së coronavirusit, presidenti ka kërkuar që FSK të jetë në gatishmëri.
“Presidenti Thaçi kërkoi që FSK-ja të jetë e mobilizuar, të rrisë deri në maksimum nivelin e gatishmërisë dhe të ndihmojë në preventimin, përballjen dhe tejkalimin e krizës”, thuhet në komunikatën e presidencës.
Gjenerali Rama është shprehur se FSK-ja është në gjendje gatishmërie dhe ka kapacitetet që të përballet me çfarëdo nevoje, si me kapacitetet e veta mjekësore, ashtu edhe me kapacitetet logjistike.
“FSK-ja është e gatshme të veprojë në çdo kohë, në çdo pjesë të Kosovës”, citohet të ketë thënë gjeneral Rama.
Sipas komunikatës presidenti Thaçi është shprehur i kënaqur me nivelin e gatishmërisë së FSK-së dhe kapacitetet për të reaguar në çdo situatë.
“Mobilizimi i FSK-së është hapi i fundit para shpalljes së gjendjes së jashtëzakonshme nga Presidenti i Republikës së Kosovës”, thuhet në komunikatë.
Aktualisht në Kosovë janë 16 raste të shfaqura me coronavirus, ndërsa dje FSK ka njoftuar se ka rritur gatishmërinë operacionale.
.