Thaçi i shkruan sërish Kurtit, e pyet nëse e don mandatin

Presidenti i vendit, Hashim Thaçi, sot ia ka dërguar edhe një letër kryetarit të Lëvizjes Vetëvendosje, Albin Kurti, në të cilën ka treguar se është duke pritur nga ai emrin  e mandatarit për formimin e qeverisë.

Presidenti Thaçi ka thënë  se për shkak të vonesave është i obliguar veprime duke ndjekur rrugët ligjore.

“Si President i Republikës së Kosovës jam i obliguar që të ndërmarr veprime pa vonesa të mëtejme, duke ndjekur të gjithë hapat kushtetues që qytetarët e Republikës së Kosovës ta kenë sa më shpejtë qeverinë e tyre. Duke marrë parasysh parimet demokratike, transparencën dhe korrektësinë politike, ua kam dhënë mundësinë dhe kam kërkuar në vazhdimësi që ta propozoni kandidatin/en për Kryeministër”, i ka shkruar Thaçi.

Thaçi e ka sugjeruar Kurtin që të ketë parasysh edhe Pikën 87 të Aktgjykimit të Gjykatës Kushtetuese në rastin nr. K0103/14, e cila vëren “se nuk përjashtohet që partia ose koalicioni në fjalë do të refuzojë të marrë mandatin”.

“Në cilindo rast, të pranimit apo refuzimit të kandidatit/es, për kryeministër, luteni që të më njoftoni sa më shpejtë sipas premtimit tuaj”, ka shkruar ndër të tjera Thaçi.

Të hënë presidenti i vendit, Hashim Thaçi ka pritur në një takim të shkurtër kryetarin e LVV-së Albin Kurti, paria e të cilit doli e para në zgjedhjet e 6 tetorit.

Pas këtij takimi Kurti kishte deklaruar se më një letër me shkrim do t’ia përcjell Thaçit emrin e mandatarit për formimin e qeverisë.

Ndërsa Thaçi i kishte dhënë afat 48 orë, dhe ndonëse ka kaluar afati, Kurti ende nuk ka dërguar letrën.