Thaçi cakton datën e mbledhjes konstituive të Kuvendit

Presidenti i Kosovës, Hashim Thaçi, me 24 dhjetor në ora 09:00, do ta thërras mbledhjen konstituive pas mbajtjtes së zgjedhjeve të 6 tetorit.

“Presidenti i Republikës së Kosovës, Hashim Thaçi, në mbështetje të nenit 66 (3) dhe nenit 84 pika (3) të Kushtetutës së Republikës së Kosovës, nenit 6 të Ligjit Nr. 03/L-094 për Presidentin e Republikës së Kosovës (GZ, Nr. 47,  25 janar 2009), si dhe duke marrë parasysh Njoftimin e datës 27.11.2019, të Komisionit Qendror të Zgjedhjeve (Nr. Protokolli të KQZ-së: 1846-2019, 27.11.2019), për certifikimin e rezultateve përfundimtare të zgjedhjeve të parakohshme për Kuvendin e Republikës së Kosovës, të pranuar nga Zyra e Presidentit më 29.11.2019 (Nr. Prot.: 1608), sot më datën 11 dhjetor 2019, ka nxjerrë Vendimin Nr. 305/2019 për thirrjen e Mbledhjes së Parë të Legjislaturës së Shtatë të Kuvendit të Republikës së Kosovës, e cila do të mbahet me datën 24 dhjetor 2019, në orën 9:00”, është bërë e ditur në një  njoftim për media.

Tutje thuhet se kryetari dhe Kryesia e Legjislaturës së Gjashtë e Kuvendit të Republikës së Kosovës, në pajtim me legjislacionin përkatës në fuqi, do të përgatisin propozimin e rendit të ditës për Mbledhjen e Parë të Legjislaturës së Shtatë të Kuvendit të Republikës së Kosovës.

Derisa Thaçi ka caktuar seancën konstitutive, në anën tjetër dy partitë VV-LDK, që morën më së shumti vota në zgjedhjet e 6 tetorit ende nuk kanë arritur marrëveshje për koalicion, kurse shumica e deputetëve kanë nisur regjistrimin për marrjen e mandatit.