Tërhiqet trupi i pajetë i Sokol Halilit nga vendi i ngjarjes

Sokol Halili, i dyshuari për vrasjen e gruas së tij Hamide Magashi, ka kryer vetëvrasje në shtëpinë e familjes së tij.

Kryeprokurori i Ferizajt, Shukri Jashari, i cili ka dalë në vendin e ngjarjes, ka thënë për KALLXO.com se trupi i pajetë është tërhequr menjëherë nga vendi i ngjarjes.

“Trupi i viktimës është larguar menjëherë nga vendi i ngjarjes dhe është dërguar në Qendrën Klinike Universitare. Ekipi mjekësor ka konstatuart vdekjen e tij” – ka thënë Jashari nga vendi i ngjarjes.

Sokol Halili kishte më shumë se 40 orë që po kërkohej nga organet e rendit në lidhje me vrasjen që ndodhi në orët e para të mbrëmjes së 30 nëntorit, para QKUK-së.

Halili dyshohej se kreu vrasjen e gruas së tij e cila ishte edhe shtatzënë.

Ajo është varrosur gjatë ditës së sotme në Lipjan.

KALLXO.com raportoi se fillimisht ishte lokalizuar vendndodhja e Halilit, që ishte shtëpia e familjes së tij në Komunën e Shtimes. Pas lokalizimit të vendit, policia ka nisur negociatat për dorëzim me babanë e të dyshuarit dhe të dyshuarin.

Sipas informacioneve, ai në prezencë të policisë ka kryer aktin e vetëvrasjes.