Tenton të kontrabandojë barna nga Serbia, ndalohet nga Policia në Dheun e Bardhë
18.8.2022 - 12:58
Policia e Kosovës ka ndaluar një person në kufi tek Dheu i Bardhë, pasi i njëjti ka pasur në veturën e tij gjetur një sasi e konsiderueshme e barnave.
Sipas komunikatës së Policisë, barnat kishin banderola të Serbisë dhe të njëjtat nuk ishin deklaruar paraprakisht.
Personi i cili dyshohet se ka tentuar t’i fusë ilegalisht barnat nga Serbia, është shtetas serb dhe të njëjtit i është sekuestruar edhe një çantë laptopi.
I dyshuari ka qenë duke vozitur automjetin e markës Citroen C3 ngjyrë e hirit.
“Bazuar në kompetencën lëndore barnat i janë sekuestruar nga Dogana e Kosovës dhe ndaj personit është iniciuar procedura për kundërvajtjen doganore”, thuhet në komunikatën e Policisë.