Ahmet Brahimaj- Foto: Kallxo.com - ARKIV
Telegram ngushëllimi i ministres Dumoshi për vdekjen e Ahmet Brahimajt
Ministrja e Kulturës, Rinisë dhe Sportit, Vlora Dumoshi përmes një telegram ngushëllimi ka ngushëlluar familjen Brahimaj, për vdekjen ish-drejtorit të Baletit Kombëtar, Ahmet Brahimaj.
“E nderuara familje Brahimaj, me pikëllim të madh e morëm lajmin për ndarjen nga jeta e të dashurit tuaj, Ahmetit. Ahmeti ka qenë njeriu me të cilin është identifikuar baleti në Kosovë. Me angazhimin e tij, ai ka bërë që të njihet jo vetëm nga artistët e ata që merren me kulturë por edhe në fusha tjera. Kur ka folur dikush për baletin e ka pasur në mendje Ahmetin. Ahmet Brahimaj është prej njerëzve të parë që është marrë me balet dhe është edukuar në këtë fushë duke qenë prej gjeneratave të para të Baletit të Kosovës. Si një ndër balerinët e parë, ai ka formuar Ansamblin e Baletit në vendin tonë në vitet e 70-ta të shekullit 20”, thuhet në telegram.
Po sipas këtij telegrami, Brahimaj ka luajtur në mëse 40 premiera baleti e në shumë premiera tjera artistike duke pasur rolet kryesore, duke dhënë edhe kontribut në formësimin e gjeneratave të reja të baletit.
“Baleti i Kosovës por edhe kultura shqiptare në përgjithësi ka humbur një figurë shumë të madhe duke e lënë një zbrazëti të pazëvendësueshme. Ahmeti do të kujtohet dhe do të mbetet i paharruar përmes veprave të shumta e gjurmëve të pashlyera që la pas. Mes bashkëpunëtorësh, shëmbëlltyra e tij do të mbetet përjetësisht udhërrëfyes i punës dhe angazhimit”, thuhet në telegramin e ministres Dumoshi, drejtuar familjes Brahimaj.
Ish- drejtori i Baletit Kombëtare të Kosovës, Ahmet Brahimaj ka ndërruar jetë sot në moshën 66 vjeçare.