Të shtëna me armë zjarri, dy të plagosur në Viti

Dy presona janë plagosur pas të shtënave me armë zjarri në Fshatin e ri në Viti, të enjten (08.08.2024) rreth orës 10:07. Në lidhje me rastin është arrestuar një i dyshuar.

Rastin e ka konfirmuar për KALLXO.com zëdhënësi i Policisë së Kosovës për rajonin e Gjilanit, Ismet Hashani.

“Me datën 08.08.2024 në ora 10:07, Stacioni Policor në Viti ka pranuar informacion se në Fshatin e Ri, komuna e Vitisë ka të shtëna me armë zjarri si pasojë e të cilave janë plagosur dy persona. Njësitet policore relevante me urgjencë i janë përgjigjur rastit dhe nga hetimet e para mësohet se dy persona meshkuj kosovarë si pasojë e këtyre të shtënave janë plagosur”- tha ai.

Sipas Hashanit, personat e plagosur janë duke marrë trajtim mjekësor.

“Të njëjtit pas marrjes së ndihmës së parë qendra e mjekësisë familjare në Pozheran janë transferuar në Spitalin Rajonal të Gjilanit ku aktualisht po trajtohen. Sipas mjekut kujdestar të plagosurit për momentin janë jashtë rrezikut për jetë”- tha ai.

Policia thotë se janë konfiskuar edhe dy armë zjarri.

“Njësitet Policore kanë identifikuar dhe arrestuar një person mashkull kosovar, po ashtu në vendin e ngjarjes janë konfiskuar edhe dy armë zjarri. Hetues policorë nga njësiti i hetimeve në koordinim me Prokurorin e Shtetit aktualisht janë duke punuar për ndriçimin dhe sqarimin e të gjitha rrethanave të rastit”- theksoi zëdhënësi i Policisë.