Fotografi nga vendi i ngjarjes pas vrasjes në një hotel në Prishtinë, Foto; KALLXO.com

Të plagosurit me thikë në hotelin në Prishtinë të dyshuar për vrasje të rëndë

Dy personat që mbetën të plagosur me thikë sot në rastin e vrasjes që ndodhi në lagjen “Arbëria” në Prishtinë po konsiderohen si të dyshuar për kryerjen e veprës penale vrasje e rëndë.

Personi që nmbeti i vrarë në këtë rast është një person i moshës afër 56-vjeçare.

Në një përgjigje për KALLXO.com, zëdhënësja e Prokurorisë Themelore në Prishtinë, Laureta Ulaj ka thënë se prokurori i shtetit ka lëshuar aktvendim mbi ndalimin e të dyve, përderisa ajo ka treguar se të njëjtit dyshohen për veprën penale të vrasjes së rëndë.

Të plagosurit aktualisht gjendën nën masat e sigurisë nga Policia, pasi që ende janë në trajtim mjekësor.

Sot rreth orës 13:20 Policia është informuar se në Arbëri të kryeqytetit, saktësisht në një hotel pati të shtëna me armë zjarri.

Policia ka thënë se menjëherë në vendin e ngjarjes kanë dalë njësitet e nevojshme policore dhe ekipi mjekësor dhe aty bazuar në të dhënat fillestare nga arma e zjarrit lëndime ka pësuar një person, i cili në vendngjarje ka ndërruar jetë e se vdekjen e tij është konstatuar edhe nga ekipi mjekësor.

Deri më tani ende nuk dihen detaje se çka dërgoi deri tek vrasja me armë zjarri dhe plagosja e dy personave të tjerë me thikë në një hotel i cili gjendet në lagjen “Arbëria” në kryeqytet.

Zyrtarë e hetues policorë janë parë ditën në vendin e ngjarjes e në anën tjetër, Naser Syla nga Emergjenca ka thënë për KALLXO.com se dy të plagosurit me thikë janë jashtë rrezikut për jetë dhe gjendja e tyre është stabile.