Sulmet ajrore amerikane shënjestrojnë talibanët në Afganistan

Ushtria amerikane ka thënë se ka nisur sulmet e para ajrore kundër talibanëve prej kur është arritur pajtueshmëri për armëpushim nga forcat militante dhe ato afgane muajin e kaluar.

Dy fazat e sulmeve kanë ndodhur më 4-5 qershor në dy provinca të ndryshme afgane, ka thënë zëdhënësi ushtarak amerikan, Sonny Leggett.

Në zonat tjera, është raportuar për 10 zyrtarë afganë të vdekur më 5 qershor, në një sulm për të cilin janë fajësuar talibanët.

Ky grup militant pati njoftuar për armëpushim treditor me forcat afgane, që ka përfunduar më 26 maj, për Festën e Bajramit.

Prej asaj kohe, është vërejtur ulje e shkallës së dhunës në gjithë Afganistanin, andaj Kabuli ka thënë se është gati për nisur bisedimet për paqe afatgjatë.

Uashingtoni ka nënshkruar marrëveshje me talibanët në muajin shkurt, në të cilën është zotuar për tërheqje të trupave amerikane, në këmbim të nisjes së bisedimeve të brendshme mes palëve me qëndrime të kundërta në Afganistan.

Ky pakt është arritur pas nëntë raundeve të bisedimeve në mes të Shteteve të Bashkuara dhe talibanëve në Katar.

Aktualisht, në Afganistan janë 13 mijë trupa amerikane.

Forcat e koalicionit ndërkombëtar të udhëhequra nga SHBA-ja kanë pushtuar Afganistanin në vitin 2001, duke larguar nga pushteti talibanët./REL