Sulm për parking në Ferizaj, arrestohen dy të dyshuar

Dy burra – njëri 75-vjeçar dhe tjetri 48-vjeçar, janë arrestuar më 04.08.2024 në Ferizaj si të dyshuar për veprën penale lëndim i lehtë trupor.

Sipas Policisë, të arrestuarit dyshohen se kanë sulmuar një burrë në rrugën “Bajram e Gursel Sylejmani”.

Dyshimet e para thonë se e gjithë ngjarja kishte filluar për shkak të parkingu të veturës, madje të arrestuarit dyshohet se viktimës ia kanë dëmtuar gomat e veturës.

Ngjarja kishte ndodhur në 23:30h. Policët e rendit me të marrë informatën ishin nisur në vendin e ngjarjes ku kishin hasur në personin që ishte sulmuar nga dy persona tjerë.

Policia tha se të dyshuarit XH.H. dhe SH.H janë shoqëruar në stacionin e policisë në Ferizaj dhe pas intervistimit nga hetuesit policorë, me vendim të prokurorit të shtetit janë ndaluar në mbajtje për 48 orë për procedura tjera hetimore.

PK-ja njoftoi se si provë materiale është sekuestruar edhe një kaçavidë, me të cilën dyshohet se është përdorur në këtë ngjarje.