Studentët e Mjekësisë që MAShTI i la dy herë jashtë listës së përfituesve të bursave elitare

Dy studentë të Fakultetit të Mjekësisë të Universitetit të Prishtinës janë ankuar për të dytën herë në Ministri të Arsimit, pasi pretendojnë se e meritojnë bursën elitare, por dy herë nuk u zgjodhën përfitues të saj.

Herën e parë, dy studentët u ankuan në një grup me 18 studentë tjerë të Mjekësisë në Ministri të Arsimit ndaj listës së parë të publikuar më 12.12.2024 të studentëve që u zgjodhën përfitues të bursës elitare për vitin akademik 2024/2025.

Këta dy studentë bashkë me 14 studentë tjerë të drejtimit “Mjekësi e Përgjithshme” në Fakultetin e Mjekësisë në UP, raportuan në KALLXO.com më 24.12.2024 se i plotësojnë kriteret e Konkursit për ndarjen e bursave elitare nga Ministria e Arsimit për vitin akademik 2024/2025 të datës 15.11.2024.

Sipas tyre, ata u penalizuan nga Ministria e Arsimit me arsyetimin se i kanë 174 kredi, e në bazë të Konkursit u kërkohen t’i kenë 60 kredi për një vit akademik. Ata kanë të përfunduar vitin e tretë të studimeve bachelor dhe i bie që duhet t’i kenë 180 kredi.

Studentët thanë se nuk mund t’i kenë 180 kredi, pasi lënda “Mjekësi interne” është lëndë trisemestrale, që fillon në semestrin e gjashtë (semestri i dytë i vitit të tretë) dhe përfundon në semestrin e tetë (semestri i dytë i vitit të katërt). Këtë çështje e ka konfirmuar edhe sekretari i Fakultetit të Mjekësisë në UP, Visar Muqaj, përmes një sqarimi që i kishte dërguar Ministrisë së Arsimit.

Ndonëse KALLXO.com nuk mori përgjigje nga data 26.12.2024 se pse nuk u është ndarë bursa elitare këtyre studentëve, ministrja e Arsimit, Arbërie Nagavci mori vendim që 16 prej atyre që u ankuan në grup, t’i gëzojë para Vitit të Ri duke i shpallur përfitues të bursës elitare më 30.12.2024.

Mirëpo, vendimi i Nagavcit e la jashtë studenten dhe studentin e Mjekësisë, të cilët më pas u ankuan ndaj këtij vendimi të hënën, më 06.01.2025. Kjo është hera e dytë që ata ankohen në Ministri të Arsimit. 

“Vendimi i mësipërm vie si rezultat i ankesës së përbashkët të një grupi të studentëve të Mjekësisë të cilët ishin lënë jashtë listave të përfituesve të bursës edhe pas plotësimit të të gjitha kushteve të konkursit, pjesë e të cilës kam qenë edhe unë. Emri im prapë nuk figuron në listën e lartcekur (vendimin nr.01B-250) edhe pse kam dëshmuar plotësimin e të gjitha kushteve të konkursit”- kanë shkruar secili nga dy studentët e Mjekësisë në ankesat e tyre, më 06.01.2025.

Të dy studentët e Mjekësisë i kanë dëshmuar KALLXO.com përmes transkriptës së notave, vërtetimit studentor e dëshmisë se kanë aplikuar në konkurs, që i plotësojnë të gjitha kriteret tjera të konkursit – përveç se i kanë 174 kredi.

Në bazë të dokumenteve të studentëve, ata kanë notën mesatare prej 9.0 e tutje, nuk e kanë të përsëritur ndonjë vit të studimeve, i kanë të përfunduara të gjitha provimet e vitit paraprak me kohë, duke mos llogaritur lëndën “Mjekësia interne” dhe kanë aplikuar me kohë në Konkursin për bursa elitare të Ministrisë së Arsimit.

Këto edhe janë shumica e kritereve të Konkursit të Ministrisë së Arsimit të datës 15.11.2024 për ndarjen e bursave elitare për studentët e Universiteteve publike të programeve bachelor e master, në vitin akademik 2024/2025. Vlera e bursës elitare është 1000 euro.

Konkursi ka qenë i hapur nga data 15.11.2024 deri më 30.11.2024. 

KALLXO.com e ka pyetur Ministrinë e Arsimit të hënën, më 06.01.2025, se cila është arsyeja që dy studentët u lanë jashtë listës së dytë të përfituesve të bursës elitare, por nuk ka marrë përgjigje deri në publikimin e këtij lajmi.

Problemi i studentëve të Mjekësisë në UP me numrin e kredive 

Katër ditë pasi u publikuan përfituesit e bursës elitare të Ministrisë së Arsimit, 16 studentët e Mjekësisë dhe 4 të tjerë kanë protokoluar në Ministri të Arsimit një ankesë grupore, në të cilën kanë sqaruar se pse nuk mund t’i kenë 180 kredi dhe se i kanë përmbushur të gjitha kriteret e kërkuara.

Madje, studentët pretenduan në ankesë se ka studentë të mjekësisë, që i kanë 174 kredi dhe janë përfitues të bursës.

“Ne kërkojmë që rasti jonë të trajtohet në mënyrë të veçantë, sepse problemi me numrin e kredive nuk ka të bëjë me ndonjë gabim teknik nga ana jonë, si dhe të marrim bursën në të njëjtën kohë me të gjithë studentët e tjerë që kanë 174 ECTS [kredi] dhe që janë përfshirë në listën e publikuar nga MAShTI më datën 11/12/2024, Vendimi 01B-224”- thuhet në ankesën e studentëve të Fakultetit të Mjekësisë, më 16.12.2024.

Ankesa është e nënshkruar dhe përmban emrat e të gjithë studentëve, së bashku me numrin e tyre identifikues në UP.

Në të njëjtën ditë, më 16.12.2024, MAShTI-t i është dërguar sqarimi i sekretarit të Fakultetit të Mjekësisë në UP, Visar Muqaj, të cilin e ka siguruar KALLXO.com. Në këtë sqarim, është shpjeguar numri i kredive për studentët e vitit të tretë dhe të katërt të Mjekësisë.

Edhe ky sqarim e pohoi atë që thanë 16 studentët e Mjekësisë, sa i përket kredive të tyre.

“Studentët e vitit të IV-të, drejtimi “Mjekësi e Përgjithshme”, nuk mund t’i kenë 180 ECTS, për shkak se me Planprogramin 2016 me të cilin janë duke i vijuar studimet, lënda “Mjekësi interne” dëgjohet në vitin e III-të (6 ECTS) dhe vitin e IV-të (6 ECTS), si dhe provimit i nënshtrohen në vitin e IV-të. Andaj, studentët që i kanë 29 provime dhe 174 ECTS kanë të përfunduar vitin e III-të”– ka sqaruar Vuqaj për MAShTI-n, më 16.12.2024.

“Studentët e vitit të V-të – drejtimi “Mjekësi e Përgjithshme” nuk mund t’i kenë 240 ECTS, për shkak se me Planprogramin 2016, me të cilin janë duke i vijuar studimet lënda “Kirurgji” dëgjohet në vitin e IV-të (6 ECTS) dhe vitin e V-të (4 ECTS), si dhe i nënshtrohen provimit në vitin e V-të. Andaj, studentët që i kanë 45 provime dhe 234 ECTS kanë të përfunduar vitin e IV-të”– ka shtuar Vuqaj.

Ai ka lënë edhe një njoftim në fund të sqarimit, duke thënë se ia ka bashkangjitur shkresës Planprogramin 2016 të Mjekësisë së Përgjithshme, të lëshuar nga Fakulteti i Mjekësisë.

Në mesin e 16 studentëve, njëri nga studentët i ka thënë KALLXO.com se gjatë aplikimit për bursë e ka ngarkuar ekstraktin e lindjes në vend të çertifikates së shtetësisë dhe se nuk e ka ngarkuar faqen e dytë të transkriptës së notave.

Megjithatë, studenti ka deklaruar se kur e ka shkruar ankesën i ka dorëzuar të gjitha dokumentet origjinale – duke e përfshirë edhe çertifikatën e shtetësisë. Ky është njëri nga studentët që figuron në Vendimin e Nagavcit, më 30.12.2024.

Studentja e Mjekësisë që e ktheu bursën elitare në janar 2024

Këtë vit, KALLXO.com ka raportuar në muajin janar dhe shkurt 2024, për një studente të Fakultetit të Mjekësisë në UP, F. Z., e cila dyshohej se nuk e kishte merituar bursën elitare të ndarë nga Ministria e Arsimit për vitin akademik 2023/2024.

F. Z. nuk i kishte përmbushur të gjitha kriteret për ta fituar bursën. Sipas një përgjigje të Komisionit të MASHTI-t, studentes i janë dashur edhe 35 kredi nga 120 sa do të duhej t’i kishte. Pra, F. Z. ka pasur provime të papërfunduara të vitit paraprak.

Pasi ky Komision e ka verifikuar se studentja nuk e ka merituar bursën, asaj i është dhënë një afat kohor për dorëzimin e bursës.

Në një bisedë për KALLXO.com, studentja e kishte pranuar se e ka kthyer bursën të martën, më 13.02.2023.