Steroidet në Prishtinë shiten pa recetë të mjekut

Në mesin e shumë parregullsive në sistemin shëndetësor të Kosovës është edhe shitja pa asnjë kriter e steroideve – medikamenteve të cilat disa sportistë i përdorin për të rritur muskujt e tyre.

Edhe pse të ndaluara për t’u shitur pa recetë të mjekut, gazetari i KALLXO.com ka arritur të blejë në dy barnatore ampula të steroideve Testosteron pa recetën e mjekut.

Duke filmuar me telefonin e tij gazetari ka dëshmuar se shitja e këtyre medikamenteve kryhet pa asnjë kriter.

Dy blerjet ndodhin në afërsi të QKUK-së në barnatore, të cilat sipas ligjit janë të licencuara dhe nuk do duhej të lejonin shitjen pa recetë të këtyre medikamenteve.

Gazetari: Po më duhet një testosteron.

Farmacisti: Ampulë a veç testosteron depo?

Gazetari: Ampulë ose pilulë, s’prish punë, cilëndo e përdor.

Farmacisti: Kjo është depo, qeshtu a e përdor qeto?

Gazetari: Çfare është? OK. Sa kushton?

Farmacistja: 3.5 është.

Gazetari: 3.5 është a? Sa copa i ka?

Farmacistja: Pesë copa i ka kutia.

Gazetari: A veç dy janë aty a?

Farmacistja: Jo, jo kam edhe tjetër.

Gazetari: Aha, OK, sa është një?

Farmacisti: 3.5 është copa, ky pe din është depo, vepron në mënyrë graduale.

Gazetari: Po, po më ka treguar ai trajneri i fitnesit.

Farmacistja: Një apo?

Gazetari: Po, njëherë një.

Farmacisti: Për fitnes a?

Gazetari: Po, për fitnes

Farmacisti: Ku?

Gazetari: Qetu në Prishtinë ushtroj që nja dy vite, dy vite e gjysmë

Farmacisti: Po a?

Gazetari: Ëhë, pak me mujtë me u zhvillu.

Farmacisti: Super, shumë mirë po ia bojshe, mirë që po gjen kohë,

Gazetari: Vështirë me gjet kohë, por po duhet.

Blerja e parë ka sukses.

Edhe barnatorja e dytë gjendet në afërsi të QKUK-së sërish kërkohet ampula e njëjtë, e cila sipas ligjit do duhej të ofrohej vetëm me recetën e mjekut.

Gazetari: Po më duhet një testosteron edhe një Dianabol a ka për fitnes?

Farmacistja: Ampulë.

Gazetari: Ampulë ose pilulë, pilulë a ka?

Farmacistja: Jo, veç testosteron ampulë.

Gazetari: E Dianabol a ka?

Farmacistja: Dianabol, jo.

Gazetari: Sa kushton një, dy e gjysmë a tri, a sa?

Farmacistja: Qashtu diçka, 3.80 një.

Gazetari: Sa, 3.80, OK, ma jep një. 3.8 euro a?

Farmacistja: Faleminderit!

Gazetari: Faleminderit, nuk thehet kjo jo?

Farmacistja: Ta shtimë në një këse më të sigurt ma mirë.

Gazetari: Qysh me e përdor?

Farmacistja: Ta aplikon dikush.

Gazetari: Okei, në lëkurë a?

Farmacistja: Po.

Në dy blerje gazetari ka arritur të sigurojë pa recetë ilaçin që është i ndaluar për t’u shitur.

Në tentativën e tretë gazetari gjen një farmaciste profesionale, e cila nuk pranon të shesë barin pa recetë të mjekut

Farmacistja: Unë ta jap se nuk është që në Kosovë lypet një recetë për me ble progesteronin ose testosteronin, tek e fundit unë jam veç punëtore dhe jam e detyrume me ta shitë, por profesionalisht nuk të kisha thanë me e marrë edhe pse ka meshkuj që lypin vazhdimisht.

Gazetari: Vazhdimisht e marrin e blejnë, ampula a?

Farmacistja: Po, po, kjo është intramuskular mirret.

Gazetari: Tabletë nuk shitni hiç a?

Farmacistja: Tabletë nuk kemi hiç valla.

Gazetari: Dianabol s’ka a? Asi tableta?

Farmacistja: Jo s’kemi  as dianabol.

Gazetari: S’po e marr pra faleminderit, vij e marrë ma vonë nashta.

Ilaçet e rrezikshme shiten pa recetë në barnatoret e Prishtinës ndërsa zyrtarisht Agjencia kosovare për produkte medicinale thotë se kjo shitje është e ndaluar pa recetën e mjekut.

“Po, steroidet janë produkte medicinale të cilat mund të importohen vetëm po qe se janë të regjistruara në Republikën e Kosovës gjegjësisht në AKPPM. Shitja e steroideve lejohet vetëm në barnatoret dhe vetëm me recetë apo përshkrim të mjekut”, thuhet në përgjigjen e AKPPM-së për KALLXO.com.