Specialët e Policisë shkojnë në Aeroport shkaku i grevës

Njësitet speciale të Policisë së Kosovës kanë shkuar në Aeroportin Ndërkombëtar të Prishtinës “Adem Jashari” ndërsa punëtorët e Aerop0ortit kanë hyrë në ditën e tretë të grevës.

Burime të KALLXO.com thonë se policia është ftuar në aeroport shkaku i grevës dhe nëse mund të ketë tensionim te situatës të njëjtit janë të udhëzuar të veprojnë për të mbajtur rendin brenda objektit të aeroportit.

Punëtorët kanë hyrë në grevë pasi thonë se përpjekjet për të dialoguar me menaxhmentin rreth kërkesave të tyre deri më tash nuk kanë treguar rezultate.

Nëse në dy ditët e mëparshme kemi pasur grevë njëorëshe, respektivisht dy orëshe, sot greva do të zgjasë 6 orë.

Ajo ka nisur ora 08:00 dhe do të përfundojë në ora 14:00.

Pesë kërkesat e tyre kyçe të punëtorëve karshi menaxhmentit të Aeroportit të Prishtinës janë kompensimi dhe benefitet për rrezikshmërinë, të eliminohen dallimet në pagesë në rastet ku punëtorët kanë detyrat dhe përshkrimin e njëjtë të punës, orët e njëjta të punës duke ngritur pagat e ulëta në nivelin e barabartë me kolegët, pagesën për përvojë të punës, orët e punës gjatë vikendit të paguhen, si dhe pagesa e shujtës.

Në dy ditët e mëparshme, greva ka shkaktuar vonesa dhe tollovi në Aeroportin Ndërkombëtar të Prishtinës, duke bërë që shumë fluturime të shtyhen.