Foto: Mirosllav Lajçak / Twitter

Sot mbahet takimi i radhës në Bruksel mes Kosovës dhe Serbisë

Zëvendëskryeministri Besnik Bislimi do të marrë pjesë në takimin e radhës në Bruksel me kryenegociatorin e palës serbe, Petar Petkoviq gjatë ditës së sotme.

Në  këtë takim pritet të flitet për temën e targave dhe energjisë.

Njoftimi për këtë takim është bërë nga emisari për dialogun Kosovë-Serbi Mirosllav Lajçak dhe është konfirmuar edhe nga zëdhënësi i qeverisë së Kosovës Përparim Kryeziu.

Marrëveshja e përkohshme e targave ka përfunduar më 21 prill. Edhe pse u mbajtën disa takime për të arritur një marrëveshje përfundimtare para 21 prillit, përpjekjet nuk patën rezultat.

Edhe përkundër që marrëveshja e përkohshme për targat ka skaduar më 21 prill, edhe përtej kësaj date, veturat kanë vazhduar të vendosin letrat ngjitëse bazuar në marrëveshjen e përkohshme e cila ishte arritur në tetor mes kryenegociatorëve në Bruksel.

Më 4 maj, një darkë joformale mes kryeministrit Albin Kurti, presidentit serb Aleksandar Vuçiq, dhe të ngarkuarit të BE-së në dialogun Kosovë-Serbi, Mirosllav Lajçak është mbajtur në periferi të Berlinit.

Pas këtij takimi, Lajçak në Twitter kishte shkruar se më 13 maj do të ketë takim me kryenegociatorëve në Bruksel.