Smajl Latifi. Foto: Urim Krasniqi/KALLXO.com

Smajl Latifi tregon pse nuk po funksionalizohet Hemodializa në Rahovec

Kryetari i Komunës së Rahovecit, Smajl Latifi, përballë Jeta Xharrës në emisionin “Jeta në Komunë” është pyetur për mosfunksionalizimin e Repartit të Hemodializës në këtë qytet.

Latifi ka sqaruar se kjo nuk po realizohet pasi që se është përgjegjësi e Ministrisë së Shëndetësisë dhe Spitalit Rajonal të Prizrenit.

“Është e vërtetë që është një plagë e hapur, por ne kemi një numër të madh të rasteve me hemodializë dhe i kryejnë shërbimet në Spitalin e Prizrenit. Investimet kanë ndodhë nga Komuna e Rahovecit dhe është në fushëveprimtarinë e nivelit sekondar, ata le të bëjnë stafin dhe ne jemi gati”, tha Latifi.

Ai theksoi se u ka bërë presion gjithë ministrave por ende nuk ka pasur sukses për funksionalizimin e këtij Reparti.

“ Ju kam bërë presion prej ministrit të parë që ka qenë deri tek Armend Zemaj, vërtetë ne jemi të gatshëm, por ata duhen me bë stafin. Ne s’kemi të drejtë sepse është përgjegjësi dhe kërkon veprime të tjera që janë jashtë kompetencat ligjore të qeverisjes lokale dhe është përgjegjësi e Ministrisë dhe e Spitalit Rajonal të Prizrenit me rekrutuar stafin dhe ne jemi të gatshëm”, tha më tej Latifi.

KALLXO.com kishte raportuar se dhjetëra pacientë në kohë të pandemisë, COVID-19 është dashur të udhëtojnë për në Spitalin e Prizrenit për të marrë shërbimin e hemodializës.

Reparti i këtij shërbimi është përuruar në vitin 2017 në Rahovec, por nuk u përdor asnjëherë nga pacientët e kësaj ane.  Investimet ishin bërë në kohën sa ka qenë kryetar Komune, Idriz Vehapi nga PDK.

Komunës së Rahovecit projekti në tërësi i ka kushtuar 306 mijë e 660 euro dhe shuma që ka investuar kjo Komunë është 169 mijë e 324 euro, ndërsa donatori i projektit, kompania “Meditech” ka përkrahur projektin me 137 mijë e 337 euro.

 

Sonte në debatin “Jeta në Komunë” përballë Jeta Xharrës, është kryetari i Komunës së Rahovecit, Smajl Latifi.

Në këtë debat, Latifi do të ballafaqohet me premtimet e bëra në fushatën e vitit 2017, punët e përfunduara si dhe ato të papërfunduara deri tani, për tri vite të qeverisjes.

Tek pyetjet e ‘zërit të qytetarëve’, Latifi do të arsyetohet për mos funksionalizimin e hemodializës, mungesës së ujit e kanalizimit, me problemet e vreshtarëve të Rahovecit si dhe me problemet e mësimdhënësve të larguar nga puna e po ashtu edhe me muzeun e zbrazët të këtij qyteti.

Përballë Latifit nga ana e opozitës është vetëm asamblisti i Lëvizjes Vetëvendosje, Ali Zhuniqi. Pjesëmarrës në debat janë edhe asamblisti i AAK-së, Ali Morina dhe nënkryetari i komunës, Fatmir Iska.