Pamje nga vërshimet në Komunën e Drenasit. Foto: Kallxo.com

Situata e rënduar nga vërshimet, Hoti thotë se do angazhohet edhe FSK-në në rast nevoje

Kryeministri në detyrë i Kosovës, Avdullah Hoti ka reaguar në facebook pas reshjeve të mëdha të shiut që përmbytën disa zona.

Ai ka treguar se varësisht si rrjedh situata në vazhdim do të marrin masat, e ndoshta do të vënë në lëvizje edhe FSK-në për rastet emergjente, transmeton Ballkani.info.

Ky është postimi që përmban edhe informata me situatën në teren:

 

Postimi i plotë:

GJENDJA NGA RESHJET E SHIUT

Qendra e Situatave është në mbikëqyrje të zhvillimeve për shkak të reshjeve të shumta të shiut, në koordinim me Ministrinë e Punëve të Brendshme, Agjencinë për Menaxhim të Emergjencave, me shtabet lokale dhe me të gjitha institucionet e tjera të përfshira. Varësisht nga situata, mund të kërkohet edhe angazhimi i Ministrisë së Mbrojtjes dhe Forcës së Sigurisë së Kosovës.

Sipas të dhënave nga Qendrat Operative:

  • Në Komunën e Drenasit – uji ka depërtuar nëpër oborre të shtëpive në Poklek, Krajkovë, Tërstenik, Shtrumbullovë, Komoran dhe në qendrën e qytetit.
  • Në Komunën e Prizrenit – ka pasur përmbytje të disa bodrume të shtëpive në lagjen Arbana.
  • Në Komunën e Malishevës – janë bllokuar disa rrugë afër QMF-së, është rritur niveli i lumit Mirushai dhe janë vërshuar rrugët që qojnë në fshatrat Bajë, Marali dhe Maxharrë. Ekipet reaguese janë në vend ngjarje.
  • Në Komunën e Rahovecit – janë vërshuar disa rrugë poshtë qytetit dhe në fshatrat Gexhë dhe Kramovik.
  • Në Komunën e Pejës – ka vështirësi në pikë kalimin kufitar “Kullë” dhe në aksin rrugor Pejë–Rugovë, ndërkaq rruga për në fshatin Kuqishtë ka vështirësi të mëdha kalimi.
  • Në Komunën e Klinës – nga të reshurat e shiut ka filluar me shpejtësi rritja e nivelit të lumenjve, në disa fshatra kanë filluar të vërshohen tokat bujqësore, në fshatin Ozdrim janë rrezikuar dy familje nga depërtimi i ujit në shtëpi.
  • Në Komunën e Gjakovës – ka pasur disa pengesa në rrugët e qytetit nga vërshimet.
  • Në Komunën e Junikut – ka pasur bllokim rruge në tri lokacione në fshatin Gjocaj si pasojë e rrëshqitjes së dheut.
  • Në regjionin e Pejës – janë raportuar një numër i madh i defekteve në rrjetin e energjisë elektrike.

Ekipet janë duke intervenuar sipas nevojave dhe mundësive për intervenim.

Ftohen qytetarët të kufizojnë lëvizjet në rrugë për shkak të vërshimeve që ka në disa akse rrugore, si dhe rrëshqitjeve të dheut dhe gurëve në disa lokacione.