Shtrenjtohen prodhimet blegtorale dhe bimore në tre muajt korrik-shtator

Indeksi i çmimeve të prodhimeve blegtorale dhe atyre bimore u shtrenjtuan në tremujorin e tretë të sivjetmë në krahasim me periudhën e njëjtë të vitit 2019.

Prodhimet blegtorale u shtrenjtuan për më shumë se 3 për qind në këta tre muaj.

“Në tremujorin e tretë të vitit 2020, indeksi i çmimeve të prodhimeve blegtorale ka rritje për 3.09%, krahasuar me periudhën e njëjtë të vitit 2019. Kurse, indeksi i çmimeve të prodhimeve bimore ka rënie për (-1.36%)“, thuhet në komunikatë.

Ndërkaq, Indeksi i përgjithshëm i prodhimeve bujqësore ka rritje për 2.98 për qind, krahasuar me periudhën e njëjtë të vitit 2019.

Prodhimet, të cilat krijojnë bazë për indeksin e çmimeve të prodhimeve bujqësore janë ndarë në dy grupe kryesore: Prodhimet bimore dhe ato blegtorale. Në kuadër të prodhimeve bimore, çmimet janë grumbulluar për këto grupe: drithëra, bimë foragjere, perime, patate dhe pemë. Në prodhimet blegtorale çmimet janë grumbulluar për blegtorinë dhe prodhimet blegtorale. Në kuadër të blegtorisë, çmimet grumbullohen për katër kategori të kafshëve: gjedhe, dele, derra dhe pula. Këto çmime janë bazuar në peshën e gjallë të kafshëve. Në kuadër të prodhimeve blegtorale çmimet janë grumbulluar për: qumësht, vezë dhe mjaltë. Të gjitha çmimet janë llogaritur në Euro dhe njësitë matëse janë në: kg, litër dhe copë.

Këto të dhëna Agjencia e Statistikave të Kosovës (ASK) i bëri të ditura me publikimin e indeksit “Indeksin e Çmimeve të Prodhimeve dhe Çmimet në Bujqësi“ për tremujorin e tretë (TM3 2020).

ASK-ja më tej shton se ky publikim është i bazuar në grumbullimin e çmimeve të prodhimeve bujqësore vendore në Kosovë. Grumbullimi i të dhënave është bërë në treg, ferma dhe vendet të tjera, ku çmimet e prodhimeve bujqësore mund të grumbullohen.