Shtime, polici arrestohet për marrje ryshfeti
13.9.2019 - 15:20
Masat e fshehta të Inspektoriatit Policor të Kosovës në hetimet e një polici, e ka vënë në pranga zyrtarin e dyshuar për marrje ryshfeti.
IPK njoftoi se kishte pranuar dy ditë më herët një informacion lidhur me aktivitetin e dyshimtë për këtë zyrtar policor të Stacionit Policor në Shtime.
Hetuesit e IPK-së kanë siguruar edhe urdhëresën nga Prokuroria Themelore në Ferizaj për realizimin e masave të fshehta dhe teknike të vëzhgimit dhe hetimit.
Arrestimi ka ndodhur sot ndërsa për të dyshuarin, me vendim të prokurorit i është caktuar masa e ndalimit për 48 orë.
Sipas IPK-së, zyrtari policor dyshohet për mos ekzekutimin e urdhëresave të ndryshme të organeve të drejtësisë duke përfituar në mënyrë të kundërligjshme.