Shqipëria bllokon anijen me 22.500 tonë naftë kontrabandë nga Rusia

Policia e Shqipërisë ka bllokuar një anije që transportonte 22.500 tonë naftë që vinte nga Rusia.

Autoritetet kanë deklaruar se kishte informacine se një anije me flamur Liberian do të kontrabandonte në Shqipëri një sasi të madh nafte dhe organizoi operacionin e koduar “Embargo”.

“Kjo sasi nafte është marrë nga vendet me embargo për naftën, konkretisht nga Rusia. Anija ishte nisur nga Azerbajxhani dhe pretendohet se më pas është ngarkuar me naftë në proti Kallamata të Greqisë, nga një anije tjetër, në një sasi prej 22 500 tonë naftë”, thuhet në njoftimin e policisë shqiptare.

Gjithashtu bëhet e ditur se anija nuk kishte dokumentacion të rregullt, ndaj është bërë sekuestrimi i saj disa milje pranë portit të Durrësit si dhe janë ndaluar 22 anëtarët e ekuipazhit, të cilët do të merren në pyetje.

Rreth një muaj më parë është zhvilluar një aksion i ngjashëm, kur u sekuestrua një anije libiane e cila furnizoi në det një anije shqiptare me 50.000 litra naftë kontrabandë. Aktualisht çmimi i naftës në Shqipëri është 186 lekë për litër.

Sipas ekspertëve, Shqipëria ka çmimin më të lartë në rajon për shkak se mbi çmimin e një litri naftë rëndojnë edhe shtatë taksa. Nga ana tjetër opozita ka akuzuar se çmimi i lartë vjen edhe si pasojë e futjes në Shqipëri të mijëra tonë nafte kontrabandë.

Më 27 shkurt 2022, Shqipëria u është bashkuar sanksioneve që Bashkimi Evropian ka ndërmarrë ndaj Rusisë.

Qeveria shqiptare ka vendosur masa kufizuese që do të zbatohen për 654 individë dhe 52 subjekte. Përveç kësaj, është vendosur edhe ndalimi i udhëtimit në territorin shqiptar për personat e listuar nga BE, ndërkohë që lidhur me politikën e vizave është në shqyrtim anulimi i politikave lehtësuese për lëvizjen e diplomatëve, zyrtarëve të tjerë rusë dhe njerëzit e biznesit.Sanksionet ekonomike përfshijnë masa kufizuese në financë, energji, transport dhe teknologji.

Në sektorin e energjisë do të ndalohet shitja, furnizimi, transferimi ose eksportin në Rusi i mallrave dhe teknologjive specifike për rafinimin e naftës dhe do të vendosë kufizime në ofrimin e shërbimeve përkatëse.

Në sektorin e transportit do të ndalohet eksporti që mbulon mallrat dhe teknologjinë në industrinë e aviacionit dhe hapësirës, si dhe do të ketë një ndalim për ofrimin e shërbimeve të sigurimit dhe risigurimit dhe mirëmbajtjes në lidhje me ato mallra dhe teknologji. Do të ndalohet gjithashtu ofrimin e asistencës teknike dhe financiare përkatëse.

Në sektorin e teknologjisë do të vendosen kufizime të mëtejshme për eksportet e mallrave dhe teknologjisë me përdorim të dyfishtë, si dhe kufizime në eksportet e mallrave dhe teknologjisë së caktuar, të cilat mund të kontribuojnë në përmirësimin teknologjik të Rusisë në sektorin e saj të mbrojtjes dhe sigurisë. Kjo do të përfshijë produkte të tilla si gjysmëpërçuesit ose teknologjitë më të fundit./REL