Shpenzimi enorm i ujit, KRU Gjakova njofton për reduktime në disa fshatra

Kompania Rajonale e Ujësjellësit në Gjakovë ka njoftuar se do të ketë reduktime në disa fshatra të Gjakovës.

KRU Gjakova ka thënë se për shkak të shpenzimit enorm të ujit të pijes në këtë periudhë dhe thatësirës aktuale, furnizimi është i pa mjaftueshëm në disa zona.

Sipas kësaj Kompanie me qëllim që rezervuarët të akumulojnë gjatë natës dhe ditën të ketë furnizim të mjaftueshëm, janë detyruar të aplikojnë reduktime të furnizimit për disa fshatra të Gjakovës.

Reduktimet u tha se do të fillojnë kryesisht nga ora 19:00 deri në orët e para të mëngjesit.

KRU Gjakova ka shpjeguar se sipas linjave furnizuese reduktime do të ketë në fshatrat e Dushkajës, Cermjan, Sopot, Palabardh, Hareqë, Novosellë, Skivjan, Bec, Vraniq, Doblibarë, Berdosanë dhe Rezinë.

KRU “Gjakova” paralajmëron se kjo gjendje do të vazhdoj deri në përmirësim të situatës me furnizim.