Shpend Ahmeti: Do ta përkrahim Qeverinë e re në pika të interesit nacional

Kryetari i Komunës së Prishtinës dhe kryetari i PSD-së, Shpend Ahmeti ka uruar përsëri Lëvizjen Vetëvendosje, parti kjo nga e cila u largua një vit më parë.

Ahmeti ka shkruar se është e qartë se kush duhet të jetë në pozitë e kush në opozitë nga rezultatet e deritanishme të zgjedhjeve të 6 tetorit.

Ai thotë se çfarëdo hezitimi për koalicion nga LDK dhe VV është në kundërshtim me deklaratat e dhëna para zgjedhjeve.

Gjithashtu, ai ka pohuar se për partinë e tij, nuk është një rezultat i kënaqshëm.

Ky është postimi i plotë i Shpend Ahmetit në rrjetin social ‘Facebook’.

Tani që përfundoi numërimi preliminar i zgjedhjeve të 6 tetorit, porosia e votuesve ishte e qartë. Është e qartë dhe për atë se kush duhet të jetë në pozitë e kush në opozitë.

Shpresojmë në certifikimin sa më të shpejtë të rezultateteve dhe formimin e institucioneve për shkak të përgjegjësive që presin bartësit e ri të institucioneve. Çfarëdo zhagitje në certifikim është vetëm shenjë e humbësve të dobët. Çfarëdo hezitimi në koalicion nga dy partitë është në kundërshtim me deklaratat e dhëna para zgjedhjeve.

Siç kam thënë natën e parë, urojmë fituesin e zgjedhjeve, Lëvizjen Vetëvendosje. Pa marr parasysh dallimeve urojmë punë të mbarë në realizimin e zotimeve që i kanë dhënë, posaçërisht me ato që pajtohemi.

Për PSD, ky ishte një rezultat jo i kënaqshëm, por edhe porosi nga votuesit për vendimet e marra. Ne edhe sot besojmë se kanë qenë vendime të drejta në interes të shtetit të cilat qytetari qartazi nuk i ka përkrah në nivelin e duhur.

Ne vazhdojmë të besojmë në barazi, mirëqenie e solidaritet. Do ta përkrahim qeverinë e re në pika të interesit nacional dhe ku pajtohemi, si psh dialogu me Serbinë ku nuk ka ndryshim të kufijve e nivel të tretë të qeverisjes e deri te insistimi në rritjen e pages minimale. Por edhe do ta kundërshtojmë e monitorojmë për vendimet që nuk pajtohemi.

Do ta fillojmë një rindërtim të relacionit me qytetarin për të vazhduar luftën për socialdemokraci e mirëqenie në Kosovë.