Foto: Urim Krasniqi/KALLXO.com
Shkarkohet drejtori i Policisë së Shqipërisë
Ministri i Punëve të Brendshme të Shqipërisë, Bledi Çuçi, ka njoftuar se në mbledhjen e sotme të Qeverisë së Shqipërisë është marrë vendim që të shkarkohet Drejtori i Përgjithshëm i Policisë së Shtetit, Gledis Nano.
Ai në një konferencë për media ka thënë se një vend i tillë lidhet me situatën e krijuar në muajt e fundit në Shqipëri. Sipas Çuçit, situata e krijuar kërkonte një menaxhim më të fortë.
“Sot Qeveria mori vendim për shkarkimin e Drejtorit të Përgjithshëm të Policisë. Shkarkimi i tij lidhet me situatën e krijuar në muajt e fundit, situatë që kërkon një menaxhim më të fortë” – ka thënë ministri i MPB-së në Shqipëri.
Ai tutje ka thënë se detyrat e Nanos do t’i ushtrojë nëndrejtori i Policisë së Shtetit, Tonin Vocaj.
Dje, njëjtë si Vocajt edhe zëvendësdrejtorit të Policisë në Kosovë iu dorëzuan detyrat për menaxhimin e Policisë.
Kjo ndodhi pasi ish-drejtori, Samedin Mehmeti, kishte dorëzuar dorëheqjen e tij tek ministri i Brendshëm, Xhelal Sveçla.
Sveçla në një postim në Facebook tha se dorëheqja e Mehmetit erdhi për arsye personale dhe ndërgjegje profesionale pas rastit të fundit të dhunimit të 11-vjeçares në Prishtinë.
“Tashmë kryeministri Kurti ka liruar nga detyra z. Mehmeti dhe ka caktuar si ushtrues detyre të drejtorit të përgjithshëm z. Fehmi Hoti, zëvendësdrejtor i Policisë së Kosovës” – thuhet tutje në njoftimin e Sveçlës.