Shkarkohen kryeshefi ekzekutiv i Postës dhe zyrtari kryesor financiar, paralajmërojnë padi ndaj bordit

Kryeshefi Ekzekutiv i Postës, Shefqet Avdija, ka thënë se bordi i përkohshëm i drejtorëve të Postës së Kosovës ka bërë ndërhyrje politike dhe ka marrë vendim të paligjshëm për shkarkimin e tij nga pozita e Kryeshefit ekzekutiv dhe shkarkimin e zyrtarit kryesor financiar të Postës, Behxhet Maliqi.

“Veglat politike të pushtetit, nën vëzhgimin e policisë, ndërhynë paligjshëm në Postën e Kosovës. Njoftoj opinionin publik dhe të gjithë punonjësit e Postës së Kosovës se sot Bordi i përkohshëm i Drejtorëve të Postës së Kosovës ka bërë ndërhyrje politike duke marrë vendim të paligjshëm dhe të pabazuar në asnjë fakt për shkarkimin tim nga pozita e Kryeshefit Ekzekutiv dhe Zyrtarit Kryesor Financiar, Behxhet Maliqi”, ka thënë ai në një njoftim për media.

Sipas tij, thirrja e policisë gjatë kohës sa mbahej mbledhje ka qenë veprim skandaloz i bordit të përkohshëm.

“Përveç kësaj, rreth gjysmë ore pas fillimit të takimit, dhjetëra policë kanë ardhur para hyrjes së Postës dhe të tjera brenda Postës, pranë derës së zyrës ku mbahej takimi. Posta nuk ka ftuar policinë sepse nuk ka pasur asnjë arsye. Bordi dhe shefat e tyre kanë bërë veprim skandaloz me involvimin e Policisë brenda Postës duke shqetësuar punëtorët dhe duke dëmtuar imazhin e ndërmarrjes publike”, ka thënë tutje ai.

Avdija ka thënë se prej që ka marrë këtë pozitë nuk ka bërë asnjë shkelje ligjore.

“Unë jam emëruar në këtë pozitë më 14 tetor 2019 përmes konkursit të rregullt publik dhe deri më sot as ky Bord as ndonjë organ apo institucion tjetër nuk ka gjetur as nuk mund të gjej asnjë veprim të dëmshëm ose joligjor, përveç punës përballë sfidave të mëdha me të cilat jemi përballur që nga dita e emërimit”, ka thënë ai.

Sipas tij vështirësitë financiare të Postës së Kosovës datojnë që nga ndarja e Postës nga Telekomi i Kosovës (Vala) në vitin 2012.

“Ndërkaq, vitin 2019 e kemi përmbyllur me përformancë pozitive, përkatësisht me rritje prej 4 për qind, të të hyrave. Prejse jam zgjedhur në këtë pozitë nuk është bërë asnjë udhëtim zyrtar, nuk ka pasur asnjë shpenzim nga ana ime as nga pjesa tjetër e menaxhmentit”, ka thënë tutje ai.

Kryeshefi Ekzekutiv i Postës, Shefqet Avdija ka thënë që nën udhëheqjen e tij ndërmarrja vazhdimisht ka pasur progres, madje ai ka thënë që nuk e kanë ndërprerë punën edhe pas pandemisë së coronavirusit.

“Po ashtu, nuk ka pasur asnjë punësim, kontratë mbi vepër, etj, por ka pasur ulje të mëtejme  të çdo shpenzimi të mundshëm operativ. Përveç kësaj, ka pasur ngritje të vazhdueshme të të hyrave në Postë, në të gjitha kategoritë dhe të gjitha këto fakte i dinë edhe Bordi i përkohshëm. Paraqitja e virusit COVID-19 në Kosovë ka ndikuar edhe në Postë, por ne në asnjë moment nuk e kemi ndërprerë punën. Përkundrazi, me vetëmohim e sakrificë të të gjithë punëtorëve të Postës kemi arritur të ofrojmë shërbime në tërë Kosovën, edhe në qytete e fshatra në karantinë. E kemi bërë shpërndarjen rekorde të asistencës sociale për mbi 20 mijë përfitues pa asnjë incident të vetëm për çka na ka falënderuar edhe pushteti aktual”, ka thënë ai.

Ai ka në reagimin e tij ka thënë se që nga marrja e detyrës, së bashku me menaxhmentin kanë hartuar strategji dhe plane konkrete, shumë lehtë te realizueshme, që do t’i mundësonin Postës qëndrueshmëri afatgjate financiare dhe zhvillim në të gjithë sektorët.

“Strategjia dhe plani i janë dorëzuar edhe kësaj Qeverie dhe ne kemi pritur që të dërguarit e tyre politik përmes Bordit të përkohshëm të kryejnë punën e tyre duke aprovuar masat që do ta bënin Postën ndërmarrje publike profitabile”, ka thënë ai.

Sipas tij qeveria Kurti ka përdorur pushtetin e saj duke marrë vendime partiake,

“Mirëpo, kjo Qeveri dhe veglat e saj në këtë Bord vendosën të keqpërdorin fuqinë e pushtetit. Në takimin e parë me këtë Bord ata pa fije turpi erdhën me vendime të përgatitura në kuzhina partiake propagandistike. Duke marrë parasysh këtë, ne nuk mund ta cilësojmë ndryshe ndërhyrjen e sotme arbitrare, përveç se ky Bord ka vepruar me urdhra politikë e partiak duke mos u brengosur për ligje e procedura ligjore për qëllime propagandistike të rreme dhe përpjekje për përfitime të ulëta politike”, ka thënë tutje ai.

Për këtë vendim ai ka paralajmëruar se do të ngrisin edhe padi.

“Ky Bord vasalësh tregoi se ka për qëllim të vetëm dëmtimin e Postës së Kosovës dhe punëtorët e saj. I paralajmëroj të gjithë të dërguarit politikë në këtë Bord dhe shefat e tyre të shkarkuar nga Kuvendi i Kosovës me 2/3 e votave, se ne do t’i padisim në institucionet përkatëse të Republikës së Kosovës”, ka thënë tutje ai.

Sot është mbajtur mbledhja e menaxhmentit dhe bordit të ri të përkohshëm të Postës së Kosovës, dhe gjatë mbajtjes së kësaj mbledhja brenda dhe jashtë ndërtesës janë parë një numër i madh i forcave policore.

(FOTO) Policia rrethon Postën e Kosovës, nuk dihen arsyet e aksionit

 

Do NOT follow this link or you will be banned from the site!