'Shihemi në gjyq': Abelard Tahiri reagon ndaj vendimit të Albulena Haxhiut për noterët
Ish-ministri i Drejtësisë, Abelard Tahiri ka reaguar ndaj vendimit të sotëm të pasardhëses së tij Albulena Haxhiut, e cila e anuloi konkursin e shumëpërfolur për noterë.
Tahiri ka paralajmëruar padi ndaj Haxhiut, lidhur me këtë vendim si dhe u ka bërë thirrje kandidatëve që të shfrytëzojë të drejtën ligjore për të mbrojtur interesin e tyre juridik.
“Mbi këtë bazë, unë do ta mbroj këtë çështje në Gjykatë, në konflikt administrativ dhe do kërkoj njohjen e provimit të noterisë për të gjithë kandidatët që kanë kaluar provimin”, ka shkruar Tahiri në Facebook.
Ish-ministri ka shtuar se vendimi për anulimin e konkursit në fjalë, do prodhojë pasoja juridike e administrative pasi siç ka thënë ai, paraqet shkelje flagrante të të drejtave të fituara nga qytetarët e Republikës së Kosovës.
Ministrja e Drejtësisë, Albulena Haxhiu sot e ka anuluar procesin e përzgjedhjes së noterëve.
Rekrutimi i noterëve të rinj ishte pezulluar për shkak të dyshimeve për keqpërdorime në testin e noterisë.
KALLXO.com kishte raportuar se në mesin e kandidatëve që kishin kaluar testin me shkrim ishte edhe Gentiana Bajraktari, vjehrri i të cilës, Nehat Idrizi, kryetar i komisionit të Noterisë, i kishte përpiluar pyetjet.
Për shkak të dyshimeve për parregullsi ishte kërkuar stopimi i procesit të emërimit të noterëve të rinj.
“Unë si ministre e drejtësisë nuk mund të shtyjë përpara një proces me parregullsi dhe me humbje të besimit ku personat që i janë nënshtruar këtij procesi janë militant, anëtarë dhe familjarë të njerëzve dhe nuk mund të shtyjë përpara një proces të tillë pasi siç e dini është duke u hetuar edhe nga prokuroria”, tha Haxhiu.
Më poshtë gjeni të plotë publikimin e Abelard Tahirit në Facebook:
Në agjendën time politike e legjislative gjatë kohës sa kam drejtuar Ministrinë e Drejtësisë, në përputhje të plotë me rekomandimet e Bashkimit Evropian, Ambasadës së Shteteve të Bashkuara të Amerikës dhe programeve të ndryshme të ekspertëve, kemi punuar në avancimin e qasjes në drejtësi përmes një numri të madh projektligjesh, në mesin e të cilëve edhe atë për Noterinë.
Pas kalimit të të gjitha fazave legjislative, Ligji i ri për Noterinë ka hyrë në fuqi në Janar të vitit 2019. Ndryshimet në të, kanë qenë ndryshime që mundësojnë qasje më të shpejtë, efikase dhe profesionale në shërbimet noteriale sa më afër vendbanimeve të qytetarëve.
Që nga marrja e detyrës kam pranuar pyetje parlamentare dhe kërkesa nga banorët e vendbanimeve të ndryshme anekënd Republikës së Kosovës, asociacionet profesionale dhe Kryetarët e disa Komunave për të decentralizuar shërbimet noteriale.
Kam qenë dhe jam krenar që përmes ligjit, formulën e mëhershme që kishte krijuar monopol, 1 noter në 20 mijë banorë, e kemi konvertuar në 1 noter në 10 mijë banorë. Pas miratimit të ligjit të ri, janë bërë përgatitjet për procesin e provimit e më pastaj të emërimit të një numri të noterëve për të plotësuar nevojat emergjente dhe gradualisht, për të përmbushur nevojat me rastet e vendeve vakante, pensionimit e lënies së detyrës së noterëve ekzistues.
Jam përkujdesur që në komisionin për provimin e Noterisë të zejnë vend personat më kredibil e profesional të kësaj fushe. Pyetjet e testit janë hartuar aty për aty në Qendrën për Siguri Publike dhe testi është mbajtur nën vëzhgimin e kamerave. Nga mekanizmat përkatës janë ndërmarrë masa për shmangien e konfliktit të interesit gjë që është vërtetuar nga organi kompetent Agjencia Kundër Korrupsionit.
Pas publikimit të listës së personave që kanë kaluar provimin e noterisë, shoqëria jonë është përballur me aludime të lloj-llojshme mbi këtë proces.
Ka pasur nga ata që kanë rënë nga provimi dhe kanë kundërshtuar të njëjtin në mënyrë subjektive. Ka pasur nga ata që kanë pasur bazë për ankim dhe të njëjtëve iu është dhënë mundësia për t’u ballafaquar me vlerësimin. Të gjitha këto procese janë tërësisht normale në kuadër të veprimtarisë institucionale.
Çarjen e parë të këtij procesi nga një proces institucional, në një proces të manipuluar politikisht për qëllime të mbrojtjes së monopolit të noterëve ekzistues që gjenerojnë miliona euro brenda muajit, e ka bërë Lëvizja Vetëvendosje, të cilës kauzë i ka prirë ish Kryetarja e Komisionit për Legjislacion, sot për sot, Ministrja e re e Drejtësisë.
Në kuadër të kësaj polemike politike, jashtë institucionale, akterët vendor e ndërkombëtarë të “mafisë së konsulencës” që Kosovës tonë ia kanë mësyrë si vend eksperimentimi, i’u kanë bashkangjitur kësaj kauze, duke premtuar se pas gjenerimit të projekteve të financuara nga ndërkombëtarët, do ta rishikonin ligjin dhe se procesi i emërimit të noterëve të rinj duhet t’i lihet qeverisë së re.
Kështu, sot kur qeveria e re është në fuqi, Ministrja e re e drejtësisë ka vendosur ta anulojë procesin e rekrutimit të noterëve. Kështu pra, përmes këtij anulimi të pabazë, në mënyrë të paprecedent duke mos i lënë ligjit të ri as edhe një rast të vetëm për zbatim, ka triumfuar përkohësisht logjika se ligji i ri duhet të ndryshohet. Kështu, ka dominuar mafia e konsulencës dhe monopoli i noterëve ekzistues.
Ministrja e Drejtësisë e ka pasur premtim elektoral anulimin e këtij provimi për çfarë nuk kam asnjë problem, por ky veprim sot për sot arbitrar, do prodhojë pasoja juridike e administrative sepse paraqet shkelje flagrante të të drejtave të fituara nga qytetarët e Republikës së Kosovës.
Prandaj, mbi këtë bazë, unë do ta mbroj këtë çështje në Gjykatë, në konflikt administrativ dhe do kërkoj njohjen e provimit të noterisë për të gjithë kandidatët që kanë kaluar provimin.
Njëkohësisht, ju bëj thirrje secilit kandidat që të shfrytëzojë të drejtën ligjore për të mbrojtur interesin e tyre juridik përballë kësaj padrejtësie.
Shihemi në Gjykatë!
