Sërish dyshime për shpërthim të mundshëm në Rektoratin e UP-së, Policia rrethon objektin
Një tjetër alarm për shpërthim në Rektoratin e Universitetit të Prishtinës është raportuar sot në mesditë.
Rastin e ka konfirmuar për KALLXO.com edhe Policia e Kosovës.
Zëdhënësja e Policisë së Kosovës për rajonin e Prishtinës, Florie Ahmeti ka thënë se rreth orës 12:00 është pranuar informata për dyshimet që ndërlidhen me një shpërthim të mundshëm në Rektoratin e Universitetit “Hasan Prishtina” në Prishtinë.
Sipas saj, informacionet e para flasin se kanosja e dyshimtë ka ardhur përmes postës elektronike.
“Policia menjëherë ka dalë në vendin e ngjarjes dhe ka nisur ndërmarrjen e veprimeve operative të nevojshme për të menaxhuar me situatën”, theksoi ajo.
Objekti i Rektoratit është i rrethuar në të gjitha anët me shirita dhe nuk lejohet qarkullimi, ndërsa po lejohet lëvizja e qytetarëve në trotuare në afër të Rektoratit.
Ditë më parë ka pasur alarm për bombë në Rektoratin e UP-së por që rezultoi të ishte i rremë.
KALLXO.com sjell pamje nga vendi i ngjarjes: