Rritja e rasteve me COVID-19 - Drejtori i Policisë e ministri i Shëndetësisë në aksion

Pas rritjes alarmante në rasteve me COVID-19 në vend, mbrëmjen e sontme Ministri i Shëndetësisë dhe u.d. drejtori i Policisë personalisht i janë rrekur punës.

U. d. Drejtori i Përgjithshëm i Policisë së Kosovës Samedin Mehmeti së bashku me ministrin e Shëndetësisë Armend Zemaj, po i përcjellin nga afër njësitet policore dhe inspektorët.

“Sot në disa lokacione të ndryshme në Prishtinë dhe në Ferizaj, në orët e mbrëmjes u. d. Drejtori i Përgjithshëm i Policisë së Kosovës Samedin Mehmeti, së bashku me Ministrin e Shëndetësisë Armend Zemaj, dolën për t`i përcjellë nga afër zyrtarët policorë dhe inspektorët sanitarë, të cilët sipas detyrës zyrtare po realizonin veprimet e përbashkëta në ndërmarrjen e masave ndaj pandemisë COVID-19”, njofton Policia.

Sipas njoftimit të Policisë, ministri Zemaj dhe u. d. Mehmeti, qëndruan për disa orë së bashku me zyrtarët policorë dhe inspektorët, të cilët me përkushtim kryenin detyrat e caktuara, përfshirë edhe shqiptimin e gjobave ndaj mos zbatuesve të masave ndaj pandemisë.

“Me qëllim të parandalimit dhe zvogëlimit të përhapjes së pandemisë, Ministri Zemaj dhe u. d. drejtori Mehmeti kërkuan që të vazhdohet me ndërmarrjen e masave të menjëhershme ndaj të gjithë shkelësve të vendimeve dhe masave që lidhen me COVID-19, ç’do herë duke u bazuar në Ligjin për parandalimin dhe luftimin e pandemisë”, thuhet në njoftim.

“Njëkohësisht Policia e Kosovës dhe Ministria e Shëndetësisë vazhdojnë të kërkojnë nga qytetarët që të respektojnë dhe njëherit zbatojnë vendimet dhe masat e parapara ndaj pandemisë, sepse vetëm duke zbatuar masat e parapara mund të ndikohet në parandalimin e përhapjes së pandemisë, e që është në interes të shëndetit publik”, përfundon njoftimi.