"Rrethrrotullimet shpëtojnë më shumë jetë se semaforët"

Këtu është një ide e diskutueshme që e kthen në kokë mendimin konvencional për sigurinë rrugore: semaforët shkaktojnë aksidente, rrisin ndotjen dhe do të ishim më mirë pa to.

Përballë një numri në rritje të vdekjeve dhe lëndimeve në kryqëzimet me semaforë, një numër në rritje shtetesh në ShBA po i zëvendësojnë ato me rrethrrotullime në kryqëzimet rrugore, raporton “World Economic Forum”.

Kur bëhet fjalë për numrin e rrethrrotullimeve tashmë të vendosura, ShBA-ja mbetet prapa vendeve të tjera të zhvilluara me vetëm 73 për 1 milion banorë. Aktualisht vlerësohet të jenë rreth 7,900 në total në të gjithë ShBA-në, sipas të dhënave të mbledhura nga një bazë të dhënash mbarëkombëtare.

Por përfitimet e zgjerimit të kësaj shifre janë të qarta. Shteti i Indianës, për shembull, ka ndërtuar 256 rrethrrotullime për të zëvendësuar semaforët që nga viti 2016. Kjo ka reduktuar aksidentet, vonesat, konsumin e karburantit, ndotjen e ajrit dhe kostot e ndërtimit.

Në përgjithësi, ka pasur një ulje prej 90% të viktimave, 76% më pak të lënduar dhe një rënie prej 30%-40% të numrit të aksidenteve që përfshijnë këmbësorët, thotë shteti, duke shtuar se rrethrrotullimet gjithashtu rrisin kapacitetin e rrugëve deri në 50%.

Kryqëzimet vdekjeprurëse

Në të gjithë ShBA-në, dy persona vriten çdo ditë nga shoferët që kalojnë në të kuqe, sipas Shoqatës Amerikane të Automobilave, e cila thotë se shumica e viktimave janë pasagjerë në automjete të tjera ose këmbësorë.

Administrata Federale e Autostradave (FHWA) thotë se një e treta e të gjitha vdekjeve në kryqëzime rrugore ndodhin në ato me semaforë. Dhe sipas Koalicionit Kombëtar të ShBA-së për Rrugë më të Sigurta, afër 850 njerëz vriten çdo vit nga shoferët që injorojnë dritat e kuqe, ndërsa 143,000 lëndohen.

Siguria rrugore ka qenë një nga çështjet e diskutuara në Samitin e Transformimit Urban të Forumit Ekonomik Botëror në Detroit, Michigan, nga 6 deri më 8 dhjetor 2021.

Zgjidhjet nëpër shtete të ndryshme

Wisconsin, ka më shumë rrethrrotullime se çdo shtet i ShBA-së, me 500 të tilla. Ky shtet i vlerëson ata duke thënë se ka një reduktim “të ndjeshëm” të vdekjeve në rrugë. Çdo rrethrrotullim raportohet gjithashtu se kursen rreth 5000 dollarë në vit në faturat e energjisë elektrike të shtetit.

“Në përgjithësi, ne shohim që viktimat dhe lëndimet serioze pothuajse nuk zvogëlohen në rrethrrotullim”, tha Andrea Bill i Laboratorit të Operacioneve të Trafikut dhe Sigurisë në Universitetin e Wisconsin-Madison për Milwaukee Journal Sentinel.

Rrethrrotullimi mesatar ka vetëm tetë pika përplasjeje të mundshme krahasuar me 32 në një kryqëzim normal me katër drejtime, thekson Departamenti i Transportit i ShBA-së në raportin e tij “Rrethrrotullimet: Një udhëzues informues”. Ai gjithashtu thotë se ato janë më të sigurta për këmbësorët sepse shoferët duhet të ngadalësojnë shpejtësinë për t’i përdorur ato.

Por nuk janë vetëm dritat e kuqe që shkaktojnë vdekje dhe lëndime. Dy të pestat e të gjitha viktimave të trafikut në San Francisko shkaktohen nga makinat që kthehen majtas, drejtuesit e të cilave nuk arrijnë të dallojnë këmbësorët në vendkalimet e këmbësorëve, sipas Agjencisë Komunale të Transportit të qytetit.

Zgjidhja e agjencisë është të instalojë shtylla vertikale, gunga gome dhe zona të lyera në rrugë për të inkurajuar drejtuesit e mjeteve të ngadalësojnë shpejtësinë dhe të kujdesen për njerëzit që kalojnë rrugën. Është pjesë e programit “Vision Zero” të qytetit për të eliminuar krejtësisht vdekjet në rrugë.