Rreth 80 milionë foshnje nuk janë vaksinuar në gjithë botën
Rreth 80 milionë foshnje në të gjithë botën mungojnë në vaksinim për shkak të pandemisë së coronavirusit, tha të premten Organizata Botërore e Shëndetësisë, raporton CNN.
Pandemia ka çrregulluar programet e vaksinimit në të paktën 68 vende thanë OBSH, nisma globale për vaksinat Gavi, Fondi i Kombeve të Bashkuara për Fëmijët (UNICEF) dhe Instituti i Vaksinave Sabin në një deklaratë të përbashkët.
Ata thanë se 80 milionë fëmijë nën moshën 1 vjeç po jetojnë në ato vende.
“Ne nuk mund të këmbejmë një shpërthim vdekjeprurës me një tjetër,” tha Drejtoresha Ekzekutive e UNICEF-it Henrietta Fore në një konferencë shtypi.
OBSH lëshoi udhëzime të reja për vendet se si ato mund të rifillojnë fushatat e vaksinimit në mënyrë të sigurt gjatë pandemisë.
“Një nga çështjet e mëdha që ne gjetëm është se njerëzit nuk kanë dëshirë të vijnë për shërbime të imunizimit – nga shqetësimi për veten e tyre dhe nga shqetësimi, natyrisht, për punonjësit e kujdesit shëndetësor,” tha drejtoresha e vaksinave të OBSH-së, Dr Kate O’Brien në një konferencë lajmesh.
Plus, fakti që më pak punonjës të shëndetit që zakonisht dorëzojnë vaksinat mund të udhëtojnë si shkak i kufizimeve, mungesa e pajisjeve mbrojtëse dhe sepse janë të zënë me luftimin e coronavirusit, thanë grupet.
“Ndërprerja e programeve të imunizimit nga pandemia e Covid-19 kërcënon të lësh prapa përparime me dekada kundër sëmundjeve të parandalueshme nga vaksinat si fruthi,” tha në një deklaratë Drejtori i Përgjithshëm i OBSH-së Tedros Adhanom Ghebreyesus.
Programet e ndikuara: Fushatat e imunizimit ndaj fruthit janë pezulluar në 27 vende, ndërsa përpjekjet për të vaksinuar fëmijët kundër poliomielitit janë ndalur në 38 vende, thanë grupet.
“Ne nuk mund të lejojmë që lufta jonë kundër një sëmundje të vijë në kurriz të përparimit afatgjatë në luftën tonë kundër sëmundjeve të tjera,” tha Fore. “Kemi vaksina efektive kundër fruthit, poliomielitit dhe kolerës. Ndërsa rrethanat mund të na kërkojnë që të ndalim përkohësisht disa përpjekje për imunizim, këto imunizime duhet të rindizen sa më shpejt që të jetë e mundur. ”
OBSH tha në fund të vitit të kaluar, se fruthi u rrit globalisht për shkak të ndërprerjeve në fushatat e vaksinimit. Më shumë se 140,000 njerëz vdiqën si rezultat – shumica e tyre fëmijë të vegjël.
Përpjekjet për të zhdukur poliomielitin janë penguar vazhdimisht nga konflikti dhe vështirësitë në arritjen e zonave të caktuara. Polio gjithashtu prek kryesisht fëmijë shumë të vegjël, dhe 1 në 200 raste rezultojnë në paralizë të pakthyeshme, thotë OBSH.
Vetëm 33 raste janë raportuar në 2018 por OBSH parashikon deri në 200,000 raste të poliomielitit në vit brenda një dekade nëse virusi nuk mund të çrrënjoset nga vaksinimi.
