Rohde rikujton qëndrimin e Scholzit: Vetëm kandidatët që e njohin njëri-tjetrin mund të hyjnë në BE
Ambasadori gjerman në Kosovë, Jorn Rohde, ka rikujtuar fjalët e kancelarit, Olaf Scholz, që vetëm kandidatët që e njohin njëri-tjetrin mund të anëtarësohen në Bashkimin Europian.
Këtë qëndrim ai e përcolli nëpërmjet një ripostimi që i bëri shkrimit të shefes së re të diplomacisë së BE-së, Kaja Kallas, pas takimeve të ndara që ajo i zhvilloi me kryeministrin e Kosovës, Albin Kurti dhe me presidentin serb, Aleksandar Vuçiq, më 03.12.2024.
“Pikërisht. Ashtu siç ka thënë kancelari Olaf Scholz në vitin 2022 gjatë vizitës së tij në rajon: Vetëm ata kandidatë që e njohin njëri-tjetrin mund të marrin anëtarësimin në BE” – ka shkruar ambasadori Rohde në rrjetin social X.
Exactly. Like Chancellor Olaf Scholz said it already in 2022 during his visit in the region: Only those candidates that recognize one another can get EU-membership @Bundeskanzler https://t.co/sAGCrsRQFo
— Ambassador Jörn Rohde (@GermanAmbKOS) December 4, 2024
Diplomatja Kallas, tha më 03.12.2024 se rruga e vetme për anëtarësim në BE është normalizimi i marrëdhënieve bazuar në Marrëveshjen e Ohrit.
Ajo po ashtu tha se ka mirëpritur gatishmërinë për të bashkëpunuar plotësisht pas sulmit të fundit terrorist të ndodhur në kanalin e Ibër-Lepencit.
“Autorët duhet të përballen me drejtësinë” – shkroi ajo.
Kurti tha pas takimit se me Kallasin ka diskutuar për çështjen e integrimit europian të Kosovës dhe për raportet me Serbinë fqinje, teksa shtoi se Kallas është “në kohën e duhur dhe në vendin e duhur”.
“Nga liderët që ka Europa sot, besoj se zonja Kallas është në kohën e duhur dhe në vendin e duhur. Ne kemi shpresa të mëdha që Kosova, që rajoni i Ballkanit Perëndimor do të përfitojë shumë sa i përket vlerave europiane, demokratike, mbështetjes ekonomike e financiare dhe paqes dhe sigurisë në përgjithësi” – tha Kurti.
Ndërsa, Vuçiq deklaroi se me shefen e re të diplomacisë së BE-së ka zhvilluar bisedë të “hapur dhe të vështirë”.
Vuçiq shkroi në “Instagram” se Kallas foli për domosdoshmërinë e dialogut me Kosovën, “zgjidhjen e rastit të Banjskës dhe vendosjen e sanksioneve ndaj Federatës Ruse”.
Ndërsa theksoi se ai është përgjigjur në përputhje me politikën dhe interesat e Serbisë.
Takimet e Kallas me krerët e Kosovës dhe Serbisë mbahen disa ditë pas një shpërthimi në kanalin e ujit të Ibër-Lepencit në Zubin Potok, në veri të Kosovës.
Kosova ka fajësuar Serbinë për shpërthimin, por Beogradi ka mohuar përfshirjen dhe ka thënë se do të hetojë këtë rast.
Shpërthimi që ka ndodhur më 29.11.2024 në kanalin e ujit të Ibër- epencit në fshatin Varagë të komunës së Zubin Potokut ishte cilësuar nga Qeveria e Kosovës si sulm terrorist.
Bashkimi Europian e ka cilësuar sulmin e 29 nëntorit në Zubin Potok “akt terrorist” dhe “sabotues” të infrastrukturës kritike të Kosovës.
Gjykata e Prishtinës ka caktuar 30 ditë paraburgim ndaj të dyshuarit Jovan Viqentijeviq lidhur me rastin e shpërthimit në kanalin e ujit të Ibër-Lepencit, në fshatin Varagë të komunës së Zubin Potokut, më 29.11.2024.
Ndërkaq, me 02.12.2024, Policia e Kosovës bëri të ditur se më 01.02.2024 ka arrestuar edhe një person të dyshuar për sulmin në kanalin e Ibër- Lepencit.
Për sulmin në kanalin e Ibër- Lepencit, drejtori i përgjithshëm i Policisë së Kosovës, Gazmend Hoxha, ka thënë se është përdorur një sasi e konsiderueshme e eksplozivit, nga 15 deri në 20 kilogramë, i cili dyshohet se është aktivizuar me detonator mekanik përmes fitilit ndezës me djegie të ngadalshme.
