Reagon Kryeprokurori i Shtetit pas hulumtimit të KALLXO.com për 'Pazaret me hetime'

Pas hulumtimit të KALLXO.com i transmetuar mbrëmjen e kaluar ku shfaqi njërën nga aferat e mëdha të keqpërdorimeve në rajonin e Prizrenit ka reaguar Zyra e Kryeprokurorit të Kosovës, Aleksandër Lumezi.

“Zyra e Kryeprokurorit të Shtetit njofton opinionin se ka filluar ndërmarrjen e të gjitha veprimeve ligjore para se të paraqitet në publik hulumtimi i “Kallxo.com”-it, i publikuar mbrëmë më datën 07.04.2021, lidhur me pretendimet se janë dhënë “5 mijë euro për ta mbyllur lëndën në Prokurori””, thuhet në njoftimin e Zyrës së Kryeprokurorit.

Tutje në njoftim thuhet se Kryeprokurori i Shtetit me të pranuar informacionin lidhur me këto dyshime, më datën 10.02.2021, ka autorizuar Prokurorinë Speciale të Republikës së Kosovës (PSRK) që t’i fillojë hetimet për zbardhjen e tërësishme të rastit, ku janë të përfshirë tre persona në video-incizim.

“Prokuroria Speciale menjëherë ka filluar hetimet, të cilat janë zhvilluar me intensitet dhe prioritet të lartë. Njoftojmë opinion se hetimet kanë përfunduar, me ç’rast janë siguruar prova të mjaftueshme dhe shumë shpejtë do të ketë vendim përfundimtar nga ana e Prokurorisë ndaj tre personave lidhur me veprën penale “Ushtrim i ndikimit” nga neni 431, Paragrafi 1 dhe Paragrafi 2 i Kodit Penal, që ka qenë fuqi në vitin 2017, kur edhe dyshohet të jetë kryer vepra penale”, vazhdon njoftimi i Zyrës së Kryeprokurorit.

Gjithashtu, Kryeprokurori i Shtetit, Aleksandër Lumezi, ka kërkuar nga Kryeprokurori i Prokurorisë Themelore në Prizren, Admir Shala, si autoritet kompetent, që të ndërmarrë të gjitha veprimet e nevojshme sipas ligjit ndaj prokurores së rastit nëse vërtetohet që e njëjta ka bërë sjellje eventuale, të cilat janë në kundërshtim me ligjin për përgjegjësinë disiplinore të gjyqtarëve dhe prokurorëve.

Hulumtimi i KALLXO.com:

Dardan Hoxha nga Prizreni ka denoncuar në emisionin “Kallxo Pernime” njërën nga aferat e mëdha të keqpërdorimeve në rajonin e Prizrenit.

Dardani, një i dënuar për legalizim të përmbajtjes së pavërtetë, ka rrëfyer në emision se ka paguar mbi 5 mijë euro mito, para këto të cilat, sipas tij, i janë kërkuar për të lehtësuar lëndën në Prokurorinë e Prizrenit.

Dosja e tij, sipas hulumtitit të KALLXO.com, ishte hetuar nga prokurorja Ervehe Gashi, ndërsa Dardani ka filmuar një moment kur i dorëzon rreth 5 mijë euro në dorë të Rizam Hoxhës, një mik i burrit të prokurores që po e hetonte rastin.

“Rizami m’i ka kërkuar paratë në emër të Bajram Gashit që është burri i prokurores Ervehe Gashi”, ka rrëfyer Hoxha.

Prokurorja Gashi ka thënë se nuk ka të bëjë asgjë me këto trasanksione dhe se nuk ka qenë e njoftuar për këto diskutime.

Filmimi i cili është shfaqur gjatë emisionit shfaq Dardanin duke i numëruar paratë dhe duke i futur ato në një zarf. Tutje Rizam Hoxha, personi që i pranon paratë, kryen një telefonatë në të cilën ai dëgjohet duke caktuar një takim me një person që sipas Dardanit ishte burri i prokurores Ervehe Gashi.

Dardani në atë kohë ishte duke u ndjekur penalisht nga prokurorja Gashi ndërsa pjesë e hetimit ishte edhe babai i tij, Sadik Hoxha.

Takimi kur ishin dorëzuar paratë kishte ndodhur në gusht të vitit 2017, kohë kjo kur babë e bir ishin liruar nga paraburgimi.

Personi që i pranon paratë është Rizam Hoxha, një mik i Bajram Gashit, burrit të prokurores Ervehe Gashi. Miqësia në mes Gashit e Hoxhës është konfirmuar nga vetë Bajram Gashi në një përgjigje me shkrim që e ka dhënë për emisionin.

Pas dorëzimit të parave Dardani ka rrëfyer se babai i tij, Sadik Hoxha, ishte takuar me burrin e prokurores Ervehe Gashi në shtëpinë e vikendit të këtij të fundit.

Takimi kishte ndodhur në kohën kur prokurorja ishte duke e hetuar rastin dhe Sadik Hoxha ishte pjesë e hetimit penal në këtë dosje.

Sadik Hoxha ka rrëfyer se gjatë kohës kur ai ishte duke u hetuar ishte takuar dy herë me burrin e prokurores për të diskutar për lëndën.

“Në takime kemi diskutu për lëndën”, ka rrëfyer Sadiku.

Sipas tij takimet ishin aranzhuar nga Rizam Hoxha, personi që shihet në pamje duke e pranuar zarfin me para.

Takimet janë konfirmuar edhe nga burri i prokurores Gashi.

Bajram Gashi në një përgjigje ka thënë se takimi ishte caktuar nga Rizam Hoxha mirëpo sipas Gashit ai e kishte njoftuar se nuk mund të kryente punë.

“Ju kam bërë të qartë që nuk mund t’i ndihmoj asgjë”, ka thënë Gashi në një përgjigje me email për emisionin.

Ai ka thënë se për këtë takim nuk e kishte njoftuar gruan.

Në rrëfimin e tij Dardan Hoxha ka thënë se ky takim kishte ndodhur një natë para se prokurorja të jepte fjalën përfundimtare moment ky kur Prokuroria grumbullon provat dhe i paraqet para Gjykatës.

“Kur kemi shku në Gjykatë nuk na e kanë hjekë asnjë vepër”, ka rrëfyer Hoxha.

Hulumtimi zbardh takime të tjera në mes burrit që mori paratë, Rizam Hoxha dhe familjes së Dardanit.

Ky i fundit ishte dënuar me burg nga Gjykata e Prizrenit ndërsa pas këtij momenti Dardani kishte nisur të kërcënonte se do i publikonte materialet filmike ku ai i dorëzonte paratë.

Të dhënat tregojnë që në këtë kohë ishte organizuar një takim në mes Bajram Gashit,Rizam Hoxhës, Sadik Hoxhës dhe Dardan Hoxhës.

Në këtë takim, i cili është filmuar, ka pasur biseda interesante ku janë përmendur dorëzimi i parave ndërsa në disa momente Bajram Gashi ka përmendur se mund ta denoncojë Dardanin për shantazh dhe kërcënim.

Në rrëfimin e tij Dardan Hoxha pretendon se në këtë takim kishte marrë zotim nga Bajram Gashi që nëse rasti nuk do shkonte tutje prokurorja nuk do bënte ankesë.

“Më ka thënë që nëse nuk i kërkon kryeprokurori prokurorja nuk bën ankesë”, ka thënë Hoxha.

Ai për këtë çështje ka paraqitur një video-incizim nga ai takim ku Bajram Gashi dëgjohet duke përmendur ankesën dhe mundësinë që kryeprokurori t’ia kërkonte këtë prokurores Gashi.

Në bisedë Gashi përmend edhe dënimet që Rizam Hoxha do i merrte në rast se do dërgohej ky rast në prokurori e po ashtu dënimet që Dardan Hoxha do i merrte në rast se ai do denoncohej për kërcënim.

“Ky pesë e ti tri”, dëgjohet duke thënë Gashi.

Ai madje dëgjohet duke thënë se këtë denoncim nuk po e bën për shkak se po i dhimbset Dardanit.

I pyetur për këtë takim Bajram Gashi nuk e ka mohuar takimin me dy personat e dënuar nga akuza e ngritur nga gruaja e tij.

Ai ka thënë se këtë takim e kanë realizuar për të sqaruar disa kërcënime ndaj familjes së tij ndërsa thotë se përmendjen e dënimeve e kishte bërë për ta paralajmëruar Hoxhën për t’i ndaluar kërcënimet.

Në të tërë këtë histori prokurorja Ervehe Gashi ka thënë se nuk ka ditur asgjë për këtë rast.

“Për mua lënda është përfunduar siç duhet dhe personi është dënuar me aktakuzën time”, ka thënë Gashi.

Ajo ka thënë se nuk ka qenë e njoftuar për këto takime dhe për mundësinë që për dosjen të jenë paguar paratë. Ajo madje ka thënë që as burri i saj nuk e kishte njoftuar për këtë ngjarje.

Emisioni “Kallxo Pernime” ka tentuar ta kontaktojë edhe me Rizam Hoxhën, personin që apostrofohet në këtë ngjarje, mirëpo ai ka qenë i paarritshëm.

Dosja me materialet e transmetuara është pjesë e një hetimi  në Prokurorinë Speciale të Kosovës dhe hetimet janë duke u zhvilluar me një intensitet të lartë.