Rasti me 'pajisjen e dyshimtë' në veturën e gazetarit Vehbi Kajtazi, deklarohet Policia e Kosovës
Në lidhje me rastin e pajisjes në veturën e gazetarit Vehbi Kajtazi, Policia e Kosovës ka deklaruar se kanë intervistuar gazetarin Kajtazi dhe sipas informatave fillestare, siç thonë dyshohet se pajisja që pretendohet se ka qenë e vendosur në veturën e tij është GPS (Sistemi Global i Pozicionimit), pajisje që tregon vendndodhje.
Kështu deklaroi Policia e Kosovës në një përgjigje për KALLXO.com.
“Është intervistuar gazetari në fjalë dhe këto informacione (edhe një pajisje/dëshmi që sipas informatave fillestare dyshohet të jetë GPS), janë duke u trajtuar në bashkëpunim me prokurorinë për të sqaruar rrethanat dhe dyshimet e tjera, përfshirë këtu edhe angazhimin e profesionistëve të Policisë së Kosovës që merren me trajtimin e mjeteve apo pajisjeve të dyshimta” – thuhet në përgjigjen e Policisë, më 31.10.2024.
Policia nuk ka ndarë më shumë informacione, por kanë thënë se për mbarëvajtjen dhe rezultatet e hetimeve që po realizohen në bashkëpunim me prokurorinë, do të njoftoheni me kohë.
KALLXO.com e ka pyetur edhe Prokurorinë e Prishtinës për këtë rast, por nuk ka marrë përgjigje deri në publikimin e këtij artikulli.
Gazetari Vehbi Kajtazi ka njoftuar sot më 31.10.2024 se një pajisje e dyshimtë i është vendosur në veturën e tij.
Sipas Kajtazit, pajisja e dyshimtë që ka qenë e vendosur në veturën e tij është zbuluar pasi ai e kishte dërguar veturën për kontrollim sot, më 31.10.2024.
Kajtazi po ashtu njoftoi se Policia ka dalur në vendin e ngjarjes dhe se është i njoftuar prokurori i shtetit për këtë rast.
“Sot kam sjell veturën në servis për kontroll. Gjatë kontrollit është zbuluar se në veturën time është një pajisje e dyshimtë e vendosur në anën e majtë afër rrotës. Policia është në vend të ngjarjes duke pritur njësitë e specializuara. Për këtë rast është njoftuar edhe prokurori i shtetit” – ka shkruar Kajtazi në Facebook, më 31.10.2024.
Ndërkaq, para një ore në profilin e Kajtazit në Facebook është ndarë edhe një video me përshkrimin “Pajisja që u gjet në veturën e gazetarit Kajtazi” e në të cilën shfaqen pamje të një pajisjeje, një veture të Policisë dhe një veture që sipas videos ndodhet në një vend ku bëhet kontrollimi i veturave.
