Raporti i ekspertëve të BE-së për mangësitë e sistemit zgjedhor në Kosovë

Korniza ligjore për zgjedhjet në Kosovë mbetet në thelb e pandryshuar që nga zgjedhjet e parakohshme parlamentare të vitit 2014, përkundër misioneve të shumta të vëzhgimit të zgjedhjeve nga BE-ja.

Kështu thuhet në raportin të cilin e ka siguruar KALLXO.com, të Misionit të Ekspertëve të Zgjedhjeve i Bashkimit Evropian në Kosovë për zgjedhjet e jashtëzakonshme të 14 shkurtit të këtij viti.

“Ekzistojnë mangësi të konsiderueshme, të tilla si zbrastësitë, paqartësitë dhe mospërputhjet që mundësojnë zbatimin jokonsistent dhe selektiv si dhe anashkalimet, duke përfshirë KQZ-në dhe gjykatat. Kjo ndikon në mënyrë të panevojshme në aspekte të rëndësishme të procesit zgjedhor, të tilla si certifikimi i kandidatëve, regjistrimi i votuesve dhe rezultatet e zgjedhjeve”, thuhet në raport.

Në dokument theksohet edhe mos certifikimi i kandidatëve për shkak të dënimeve penale gjatë tri viteve të fundit, përfshirë bartësin e listës së Lëvizjes Vetëvendosje, Albin Kurti.

Ky i fundi ndonëse nuk figuroi në listën e fletëvotimeve, u zgjodh kryeministër i Kosovës pasi u nominua në Kuvend, ngaqë LVV-ja mori mbi 50 për qind të  votave të qytetarëve nga zgjedhjet e 14 shkurtit.

“Ligji për Zgjedhjet e Përgjithshme skualifikon individët nga e drejta për t’u kandidauar, pas një dënimi të formës së prerë për ndonjë vepër penale gjatë tri viteve të fundit, e cila është jo-propocionale dhe në kundërshtim me standardet ndërkombëtare”, thuhet në raportin e hartuar nga ekspertët evropianë.

Tutje në këtë raport përmenden polemikat politike që në atë kohë bëheshin në KQZ, kryesisht  mes përfaqësuesve të LVV-së me partitë tjera.

Ekspertët evropianë e kanë shtuar edhe faktin se si në atë kohë, ushtruesja e detyrës së presidentes, Vjosa Osmani e cila edhe ishte në krye të listës zgjedhore të LVV-së, [si kandidate për presidente], e kishte kritikuar publikisht ish-kryetaren e KQZ-së Valdete Daka  para ditës së zgjedhjeve, duke e akuzuar atë për anshmëri dhe sjellje joprofesionale.

Deklarata e Osmanit ndaj Dakës në atë kohë kishte ngjallur reagime të shumta nga spektri vendor e ndërkombëtar, duke e kritikuar u.d presidenten për ndërhyrje në institucionin e KQZ-së.

Mosrespektimi i masave kundër pandemisë gjatë fushatës, rinumërimi i votave për shkak të mospërputhjeve, gjatë procesit të zgjedhjeve të jashtëzakonshme parlamentare të 14 shkurtit, ishin edhe disa nga mangësitë që i ka evidentuar Misioni i Ekspertëve të Zgjedhjeve i BE-së në Kosovë në këtë raport.

Pas caktimit të zgjedhjeve të parakohshme parlamentare më 14 shkurt 2021, BE-ja dërgoi një Mision të Ekspertëve të Zgjedhjeve të përbërë nga tre ekspertë të cilët mbërritën në Kosovë më 21 janar.

Qëllimi i tyre ishte mbledhja dhe analizimi i informacionit faktik, vlerësimi dhe raportimi për procesin zgjedhor kundrejt zotimeve, standardeve dhe praktikave të mira ndërkombëtare për zgjedhje demokratike.

Kosova këtë vit do të organizojë edhe një palë zgjedhje, ato lokale të cilat do të mbahen më 17 tetor.
https://kallxo.com/lajm/lemshi-me-votat-jashte-kosoves-ne-zgjedhjet-e-14-shkurtit-sipas-eksperteve-te-be-se/