Raporti i DASh-it: Kosova si një nga vendet më të varfra në Evropë, u godit rëndë nga pandemia
Raporti i Departamentit Amerikan të Shtetit për Klimën e Investimeve në Kosovë për vitin 2021, ka theksuar se Kosova si një nga vendet më të varfra të Evropës, u godit rëndë nga pandemia COVID-19.
Në raport thuhet se Kosova ka potencial për të tërhequr investime të huaja direkte, por kjo është e kufizuar mes tjerash edhe nga korrupsioni.
Në raport përmenden zgjedhjet e shpeshta që janë mbajtur në Kosovë, duke u thënë se “në vitet e fundit, interesat politike dhe ekonomike të elitave të Kosovës gjithnjë e më shumë po priren të rezultojnë në korrupsion”.
Megjithatë, DASh thotë se Qeveria e re (Kurti 2), e cila mori detyrën më 22 mars, funksionoi në një platformë të fortë kundër korrupsionit dhe ka një mandat të fortë elektoral për të miratuar ndryshime pozitive.
“Kosova ka potencial për të tërhequr investime të huaja direkte (IHD), por ky potencial është i kufizuar nga dështimi për të adresuar disa çështje serioze strukturore, përfshirë integrimin e kufizuar ekonomik rajonal dhe global; paqëndrueshmëria politike dhe ndërhyrja në ekonomi; korrupsioni; një furnizim jo i besueshëm i energjisë; një sektor i madh informal; vështirësi në krijimin e të drejtave pronësore; dhe sundimi i paqartë i ligjit, duke përfshirë një mungesë të dukshme të zbatimit të kontratës”, thekson DASh-i.
DASH tutje ka përmendur edhe vendimin e Qeverisë së kaluar për tërheqjen e 10% nga Fondi i Kursimeve Pensionale – Trust, që sipas tyre ka ndikuar që të ketë tkurrje më të ulët të rënies ekonomike.
Sipas DASh, parashikimet e rritjes ekonomike fillimisht parashikuan që ekonomia e Kosovës të tkurret me 7.2 për qind ose më shumë në vitin 2020.
“Megjithatë, falë masave të shpejta të Qeverisë së Kosovës – veçanërisht vendimit për të lejuar qytetarët e Kosovës të tërheqin 10 përqind të kursimeve të tyre pensionale – dhe ndihmën nga donatorët ndërkombëtarë, që nga shkurti i vitit 2021, vlerësimi i fundit i rishikuar i FMN -së parashikon një tkurrje prej vetëm 6 përqind në vitin 2020. Shumë institucione financiare ndërkombëtare mbeten të kujdesshme në parashikimin e rritjes ekonomike për vitin 2021 duke pasur parasysh rrethanat që ndryshojnë me shpejtësi të pandemisë, por shumica presin që PBB -ja e Kosovës të rritet midis 3.5 dhe 4.5 përqind në 2021”, thuhet tutje në raport.
Departamenti Amerikan i Shtetit, thotë tutje se pandemia nuk ka çuar në ndryshime të përhershme në politikat e investimeve të Kosovës.
Sipas tyre, Qeveria miratoi disa masa lehtësuese që të gjitha janë të përkohshme dhe të fokusuara në ruajtjen e niveleve të punësimit dhe ndihmën e bizneseve për të ruajtur likuiditetin. “Si i tillë, masat e lehtësimit COVID-19 të Kosovës nuk ndikuan në mënyrë të konsiderueshme në politikën e saj më të gjerë të investimeve”.
Një sektor kyç i ekonomisë që ka mbajtur një rritje të fortë siç theksohet në raport, është sektori i përpunimit të drurit.
“Kompanitë që prodhojnë kuzhina, banjë, dyer, mobilje të veshur me susta dhe dru, metal dhe qelq të kombinuar kanë parë investime të rritura që nga viti 2017. Sektori po piqet dhe po merr mbështetje në shërbimet e zhvillimit të biznesit dhe qasjen në financa”, thuhet në raport.
Sipas DASh-it, Kosova po adreson gjithashtu sigurinë e saj të energjisë duke rritur kapacitetin e saj të energjisë së rinovueshme dhe duke lehtësuar projekte më të bankueshme të ripërtëritshme.
Sa i përket sundimit të ligjit, në raport thuhet se ligjet dhe rregulloret e Kosovës janë në përputhje me standardet ndërkombëtare për mbështetjen dhe mbrojtjen e investimeve, megjithëse zbatimi i sektorit të drejtësisë mbetet i dobët.
DASh ka theksuar se në Kosovë vazhdimisht është renditur shkalla e lartë të papunësisë, si ndër shqetësimet e saj më të mëdha.
“Nivelet e papunësisë për punëkërkuesit dhe gratë për herë të parë janë dukshëm më të larta se norma zyrtare”, është gjetja e raportit.
KALLXO.com ka raportuar se korrupsioni është kryefjalë e raporteve të viteve të fundit, për të drejtat e njeriut në botë të Departamentit Amerikan të Shtetit për Kosovën.
Korrupsioni – kryefjalë e raporteve të Departamentit Amerikan të Shtetit për Kosovën
