Ramë Likaj takoi udhëheqësit e SBAShK-ut

Ministri i Arsimit dhe Shkencës, Ramë Likaj ka pritur sot kryetarin e SBAShK-ut, Rrahman Jasharaj dhe koordinatorin për organizim të brendshëm të kësaj Sindikate, Ymer Ymeri, me të cilët ka biseduar për bashkëpunimin mes Ministrisë dhe Sindikatës në të mirë të zhvillimit të arsimit në vend.

Sipas një njoftimi për meida, Likaj shprehu gatishmërinë për të punuar ngushtë me SBAShK-un dhe theksoi se kjo Sindikatë do të jetë pjesë e proceseve në krijimin e politikave zhvillimore të arsimit dhe në zbatimin e tyre.

Tutje thuhet se udhëheqësit e SBAShK-ut i uruan ministrit Likaj detyrën dhe e falënderuan atë për gatishmërinë për bashkëpunim. Po ashtu, u shprehën të gatshëm të japin kontributin e tyre si Sindikatë në të mirë të ngritjes së cilësisë në të gjitha nivelet e arsimit.

Likaj u emërua në pozitën e ministrit të Arsimit me votimin e Qeverisë Hoti me 3 qershor dhe vjen nga AAK-ja.