Dr. Lul Raka
Raka: Pas lirimit të masave, e pritshme rritja e numrit të rasteve me COVID-19 në Kosovë
Profesori i Mikrobiologjisë dhe Kontrollit të Infeksioneve në Universitetin e Prishtinës, Lul Raka ka thënë se rritja e numrit të rasteve me COVID-19 në Kosovë, pas lirimit të masave është e pritshme.
Sipas tij, numri i rasteve do të jetë në korrelacion me zbatimin e masave parandaluese nga secili qytetar i Kosovës.
“Virusi është ende këndej pari dhe do të shfrytëzojë çdo pakujdesi tonën”, ka shkruar ai në Facebook.
“Jemi në muajin e tretë të përballjes me COVID-19. Rezultatet e deritashme të menaxhimit të suksesshëm të kësaj pandemie kanë qenë kryekëput fryt i vetëdijesimit dhe përgjigjes suaj ndaj këshillave të MSH, IKSHPK dhe profesionistëve shëndetësorë”, thuhet në publikimin e tij.
Deri më tani në Kosovë, sipas të dhënave zyrtare janë konfirmuar 1,234 të infektuar, janë shëruar 890 pacientë dhe 31 kanë vdekur.
Sipas Rakës, këshillat i dijmë tashmë të gjithë, por ato janë për t’u zbatuar në praktikë:
- Mbani distancën fizike gjatë tërë kohës. Kjo është komponenta kryesore në parandalim!
- Në vendet ku nuk mund të mbahet distancë (autobus, qendra tregëtare, vende të mbipopulluara me njerëz), vendosni maskat ose mburojat e fytyrës!
- Shmangni qëndrimin në brendi të lokaleve që janë përplot me njerëz. Mundësisht, qëndroni në terasa të këtyre lokaleve!
- Vazhdoni me higjienën e duarve!