QKUK, vidhen telefona në Klinikën e Pediatrisë
Disa prej prindërve që janë në kujdesje të fëmijëve të shtrirë në Klinikën e Pediatrisë në Qendrën Klinike Universitare të Kosovës kanë qenë viktima të një vjedhje.
Atyre u janë vjedhur telefonat gjatë natës.
KALLXO.com mëson se vjedhja është kryer atëherë kur të gjithë kanë qenë në gjumë, ndërsa Qendra Klinike Universitare e Kosovës thotë se janë lajmëruar organet kompetente.
“Zyra për informim, ju njofton se kompania e sigurimit fizik dhe klinikat përkatëse kanë njoftuar oganet kompetente, policinë e Kosovës, të cilët po hulumtojnë rastet. Në të njëjten kohë kemi kërkuar nga kompania e sigurimit fizik të rrisë masat e sigurisë në klinika e QKUK-së” thuhet në përgjigjen e QKUK-së.
QKUK thotë se është në dijeni se kanë filluar hetimet dhe shpreson e inkurajon organet kompetente të hulumtojnë këto raste që paraqesin shqetësim për Klinikat e QKUK-së, për stafin mjekësor, por edhe pacientët që marrin shërbime mjekësore.
Nga ana tjetër drejtoresha e Klinikës së Pediatrisë Drita Telaku Qosaj tha për KALLXO.com se kjo ka ndodhur edhe më herët dhe se ky është një shqetësim i madh si për stafin ashtu edhe për pacientët.
“Shpresojmë të zbardhet rasti” tha ajo.
