Qeveria miraton kursimet dhe rishpërndarjen e mbi 47 milionë eurove
Qeveria e Republikës së Kosovës, me kërkesë të Kryeministrit Avdullah Hoti dhe në pajtim me Rregulloren e Punës së Qeverisë, ka miratuar vendimin për kursime, ndarje dhe harmonizime në kategoritë e shpenzimeve të organizatave buxhetore për vitin 2020.
Sipas njoftimit të qeverisë janë kursyer mbi 47 milion euro.
“Janë kursyer 47,621,459.91 euro dhe të njëjtat janë rishpërndarë nëpër organizata buxhetore”, thuhet në njoftim të qeverisë.
Në njoftim thuhet se vendimi është miratuar sipas propozimit të Ministrisë së Financave, pasi që ka kaluar të gjitha fazat procedurale që janë paraparë me Rregulloren e Punës së Qeverisë dhe me aktet tjera nënligjore.
“Në propozim është shqyrtuar i gjithë dokumentacioni me përmbajtjen e të gjitha të dhënave dhe informatave të nevojshme për miratimin e këtij vendimi”, thuhet tutje.
Sipas njoftimit të qeverisë, propozimi është në përputhje edhe me Programin e Qeverisë dhe brenda afateve të parapara ligjore.
“Gjithashtu është harmonizuar me të gjitha ministritë përgjegjëse, agjencitë dhe zyrat përkatëse, me të cilat janë kryer konsultimet për kursime, ndarje dhe harmonizime në kategoritë e shpenzimeve të organizatave buxhetore”, përfundon njoftimi.
