Putin me paralajmërime të reja drejt Finlandës dhe Suedisë
Sot është dita e 127 e pushtimit rus të Ukrainës – lufta e parë e madhe tokësore në Evropë në dekada.
Rusia ka dërguar dhjetëra mijëra trupa në Ukrainë më 24 shkurt të këtij viti me qëllim të degradimit të kapaciteteve ushtarake të Ukrainës dhe të çrrënjosjes së njerëzve që i ka quajtur nacionalistë të rrezikshëm. Forcat ukrainase janë përgjigjur me rezistencë të ashpër ndaj luftës.
Perëndimi ka vendosur sanksione të pashembullta ndaj Rusisë me qëllim që kjo e fundit të tërhiqet nga lufta mirëpo kur kjo nuk ndodhi atëherë Perëndimi, i udhëhequr nga SHBA dhe Britania e Madhe kanë nisur me armatosjen e Ukrainës me armë dhe logjistikë të ndryshme përfshirë edhe raketat e prodhimit më të ri.
Rusia e sheh ndihmën ushtarake të perëndimit si një përfshirje në këtë luftë dhe zotohet se do të përgjigjet ndaj cilitdo reagimi ushtarak.
Në ndërkohë zhvillimet më të fundit gjatë natës dhe ditës së djeshme në luftën e Ukrainës janë si në vijim:
Udhëheqësit e NATO-s e kanë shpallur një “koncept të ri strategjik” në përgjigje të luftës së Rusisë kundër Ukrainës, duke e përshkruar Moskën si “kërcënimin më të rëndësishëm dhe të drejtpërdrejtë për sigurinë dhe stabilitetin e aleatëve”. NATO e ka ftuar Suedinë dhe Finlandën të bëhen anëtarë të aleancës ushtarake, sipas një komunikate të publikuar nga samiti i NATO-s në Madrid. Udhëheqësit u zotuan gjithashtu për ndihmë të mëtejshme për Kievin dhe ranë dakord për një paketë mbështetjeje që synon modernizimin e sektorit të mbrojtjes së vendit.
Presidenti rus Vladimir Putin lëshoi paralajmërime të reja se Rusia do të përgjigjet në të njëjtën mënyrë nëse NATO-ja krijon infrastrukturë ushtarake në Finlandë dhe Suedi pasi ato të bashkohen me aleancën e udhëhequr nga SHBA. Nëse Suedia dhe Finlanda donin të bashkoheshin me NATO-n, atëherë ato duhet të “vazhdojnë”, tha Putin. “Por ata duhet të kuptojnë se nuk ka pasur asnjë kërcënim më parë, ndërsa tani, nëse kontingjentet ushtarake dhe infrastruktura vendosen atje, ne do të duhet të përgjigjemi në natyrë dhe të krijojmë të njëjtat kërcënime për territoret nga të cilat krijohen kërcënimet ndaj nesh.”
Putin gjithashtu u tërhoq kundër pretendimeve se forcat ruse ishin përgjegjëse për një sulm në një qendër tregtare të mbushur me njerëz në qytetin ukrainas të Kremenchuk të hënën, ku u vranë 18 persona. “Ushtria jonë nuk sulmon asnjë vend të infrastrukturës civile. Moska tha se ushtria e saj gjuajti një “sulm ajror me precizion të lartë në hangarët ku ruheshin armatimet dhe municionet” dhe shpërthimi i atyre depove të armëve shkaktoi një zjarr në qendrën tregtare aty pranë – një pretendim i diskredituar nga rrëfimet e dorës së parë nga të mbijetuarit dhe analizat e ekspertëve.
Ukraina njoftoi shkëmbimin më të madh të robërve të luftës që nga pushtimi i Rusisë, duke siguruar lirimin e 144 ushtarëve të saj, përfshirë 95 që mbronin fabrikën e çelikut Azovstal në Mariupol. Inteligjenca ushtarake ukrainase tha se shumica e ukrainasve të liruar kishin lëndime të rënda, duke përfshirë djegie dhe amputime, dhe tani po marrin kujdes mjekësor.
Të paktën katër persona janë vranë dhe pesë janë plagosur nga një sulm me raketa ruse në një ndërtesë banimi në qytetin jugor të Ukrainës, Mykolaiv, thanë zyrtarët lokalë. Fotografitë nga vendi i ngjarjes treguan tymin që dilte nga një ndërtesë katërkatëshe me katin e sipërm të shkatërruar pjesërisht nga sulmi të mërkurën në mëngjes. Moska e pranoi sulmin në qytet, por tha se forcat e saj kishin goditur atë që ajo e quajti një bazë trajnimi për “mercenarët e huaj” në rajon.
Presidenti amerikan Joe Biden njoftoi se SHBA do t’i rrisë forcat e saj ushtarake në të gjithë Evropën me më shumë dislokime tokësore, detare dhe ajrore. Gjatë samitit të NATO-s në Madrid, Biden njoftoi vendosjen e një brigade prej 3,000 trupash luftarake në Rumani, dy skuadrilje luftarakë F-35 në Mbretërinë e Bashkuar dhe dy shkatërrues të marinës në Spanjë. Anëtarët e NATO-s pritet të shpallin angazhime të mëtejshme për forcimin e forcave në krahun lindor të aleancës.
Britania do të angazhojë gjithashtu 1000 trupa shtesë dhe një nga dy aeroplanmbajtëset e saj të reja për mbrojtjen e krahut lindor të NATO-s. Forcat do të caktohen për mbrojtjen e Estonisë, ku Britania ka tashmë rreth 1,700 personel të dislokuar, por ato do të bazohen në Britaninë e Madhe, të gatshme për të fluturuar për ta mbrojtur vendin baltik nëse gjykohet si e nevojshme.
Njëkohësisht, qeveria britanike tha se ka premtuar 1.2 miliardë dollarë ndihmë ushtarake, pothuajse duke e dyfishuar angazhimin e Mbretërisë së Bashkuar për mbështetjen ushtarake. Sekretari i Mbrojtjes, Ben ëallace, tha se disa para ka të ngjarë të shpenzohen për furnizimin e artilerisë me raketa me rreze më të gjatë. Ky do të jetë një “hap i parë” për të lejuar Ukrainën që të lëvizë drejt “operacioneve sulmuese në rritje” për ta rifituar territorin e saj,” ishte deklarata e bërë nga qeveria britanike.
Zelenskiy njoftoi përfundimin e marrëdhënieve diplomatike midis Ukrainës dhe Sirisë pasi kjo e fundite njohu pavarësinë e dy republikave separatiste të Ukrainës lindore, Donetsk dhe Luhansk. “Nuk do të ketë më marrëdhënie mes Ukrainës dhe Sirisë”, tha Zelenskiy, duke shtuar se presioni i sanksioneve kundër Sirisë “do të jetë edhe më i madh”.
Ukraina dhe Bashkimi Evropian kanë nënshkruar një marrëveshje që liberalizon transportin rrugor. Sipas marrëveshjes, transportuesit ukrainas nuk kanë më nevojë të marrin leje për të hyrë në Bashkimin Evropian.
Turqia thotë se do të kërkojë ekstradimin e 33 militantëve të dyshuar kurdë dhe të dyshuarve të komplotit për grushtshtet nga Suedia dhe Finlanda, sipas një marrëveshjeje për të siguruar mbështetjen e Ankarasë për ofertat e anëtarësimit të vendeve nordike në NATO. Presidenti turk Rexhep Tajip Erdogan e refuzoi me javë të tëra kërkesën për të mos e vënë veton ndaj anëtarësimit të Suedisë dhe Finlandës në NATO duke e hequr veton vetëm pas bisedimeve të vështira përpara samitit të NATO-s të kësaj jave./The Guardian
