Putin i ofron Evropës gaz përmes 'Nord Stream 2', Gjermania e refuzon

Presidenti rus, Vladimir Putin ofroi të mërkurën rifillimin e furnizimit me gaz në Evropë përmes pjesës së paprekur të gazsjellësit “Nord Stream 2”. 

Ai e sugjeroi gjithashtu një alternativë përmes Turqisë.

“Topi është në fushën e BE-së. Nëse ata duan, atëherë çezmat mund të hapen dhe kjo është e gjitha” – tha ai në një fjalim në një forum energjetik në Moskë.

Gjermania, megjithatë, tha se nuk do ta merrte gazin rus përmes gazsjellësit Nord Stream 2, i cili është kthyer në një pikë ndezjeje në krizën e Ukrainës.

E pyetur nëse Berlini do të përjashtonjë përdorimin e Nord Stream 2, zëdhënësja e qeverisë gjermane Christiane Hoffmann, thjeshtë deklaroi “Po”.

“Pavarësisht nga sabotimi i mundshëm i dy tubacioneve, ne kemi parë se Rusia nuk është më një furnizues i besueshëm i energjisë dhe se edhe para dëmtimit të Nord Stream 1 nuk kishte më asnjë rrjedhje gazi”- u tha Hoffmann gazetarëve.

Sasi masive gazi u lëshuan në Detin Baltik pasi të dy lidhjet e gazsjellësit Nord Stream 1 dhe një nga dy lidhjet e gazsjellësit Nord Stream 2 u këputën më 26 shtator.

Rusia i kishte ndaluar tashmë dërgesat e gazit përmes gazsjellësit Nord Stream 1 në fillim të shtatorit, për shkak të, sipas tyre, problemeve teknike. Nord Stream 2 nuk u bë kurrë funksional pasi Gjermania e ndaloi miratimin e saj pas pushtimit rus të Ukrainës.

Putin tha se ështëe e mundur të riparohen tubacionet, por Rusia dhe Evropa duhet të vendosin për fatin e tyre.

Riparimet e Nord Stream mund të zgjasin një vit

Pushtimi rus i shtyu blerësit evropianë të fillonin procesin e heqjes dorë nga nafta dhe gazi rus dhe të kërkonin furnizues alternativë.

Duke folur në të njëjtin forum me Putinin, Alexei Miller, kreu i kompanisë ruse të energjisë Gazprom, tha se riparimet në tubacionet e dëmtuara Nord Stream do të zgjasin të paktën një vit.

Ai shtoi se nuk ka”asnjë garanci” se Evropa do ta mbijetojë dimrin bazuar në kapacitetin e saj aktual të depozitimit të gazit.

Objektet e magazinimit të gazit të Gjermanisë janë gati 95% plot dhe zyrtarët thonë se ky vend është i pozicionuar mirë për të kaluar dimrin, megjithëse përpjekjet për të kursyer gazin do të jenë të nevojshme.

Putin e prezanton qendrën kryesore të gazit në Turqi

Përpara një takimi me homologun e tij turk Rexhep Tajip Erdogan, Putin propozoi krijimin e një qendre energjie në Turqi.

“Ne mund t’i zhvendosim vëllimet e humbura nga Rrjedhat Veriore përgjatë fundit të Detit Baltik në rajonin e Detit të Zi dhe kështu të bëjmë rrugët kryesore për furnizimin me karburantin tonë, gazin tonë natyror në Evropë përmes Turqisë, duke krijuar qendrën më të madhe të gazit për Evropë në Turqi”, tha ai.

Rusia është eksportuesi i dytë më i madh i naftës në botë pas Arabisë Saudite dhe eksportuesi kryesor i gazit natyror./Deutsche Welle