Rrugëtimi i ish-partneres së kontrabandistit drejt karrigeve të pushtetit | Ilustrimi: Kallxo.com
Pse e tërhoqi vendimin për shkarkimin e pronares së barnatores ilegale nga pozita e drejtoreshës- flet Izmir Zeqiri
Ditë më parë KALLXO.com zbardhi se si ministri i Qeverisë Kurti 2, Nenad Rashiq, kishte rekomanduar për një pozicion udhëheqës gruan që njihet si ish-partnerja e njërit prej të kërkuarve për kontrabandë, Besim Zeqiri, i njohur me nofkën “Kaça” si dhe pronarja e barnatores ilegale që ishte bastisur në vitin 2021 ndërsa gjatë bastisjes u lënduan e plagosën shtatë zyrtarë policor.
Në debatin “Jeta në Komunë”, Kryetari i Zubin Potokut, Izmir Zeqiri tha se kishte thirrë në takim Gordana Mihajloviq pas emërimit dhe kishte vendosur ta shkarkonte por që më pas ministri Rashiq i kishte kërkuar që t’ia linte në dorë atij çështjen e drejtoreshës.
“Jo nuk jam duke e shkarkuar tani në këtë rrethanë, por atëherë më ka thirrë ministri Rashiq më ka thënë të lutem kryetar nëse nuk ke marrë ndonjë vendim deri tash lema këtë çështje mua, kështu ministri Rashiq më ka thënë”- shpjegoi Izmir Zeqiri në debat.
Ai madje shpjegoi nga fillimi se si u emërua në pozitë udhëheqëse ish-partnerja e “Kaçës”.
“Gordana Mihajloviq është Drejtoreshë e Shëndetësisë në kabinetin tim, është banore e Zubin Potokut, është e martuar për shqiptar. Po për Kaçën. Vonë e kam marrë vesh. Ne secili që vjen e emërojmë e sjellë një letër që s’është i dënuar, dhe fillimisht nuk e kemi ditë që Gordana Mihajloviq kush është. Se kam ditë, epo nuk e kam ditë sepse komunikimin tek përmes, një këshilltari. Në dhjetor të vitit të kaluar dhe në fillim të këtij viti e kam pasur një këshilltar të komunitetit serb. Jo nuk më kanë treguar dhe përmes tyre dhe linjës së ministrit Rashiq ne e kemi shtri bashkëpunimin dhe kemi ardh ku kemi ardh”- tregon Zeqiri.
Vetëm pak muaj pas emërimit, Zeqiri thotë se mori vesh kush është Gordana Mihajloviq.
“Unë pas dy tre muajsh kur kam kuptuar që Gordana Mihajloviq është në një lidhje me Kaçën, këtë se njoh as sot me ma qitë përpara nuk e njoh. Është i arrestuar dhe kur kam kuptuar se është në lidhje me të e kam ftu për me shkakru. A është fati apo fatkeqësi e saj që momentalisht nuk isha afër protokollit kur biseduam por në një formë vendimi ishte i imi i shkarkimit që do t’i jepej. E pata thirrë e pata ftu për këtë. Sa i përket bashkëpunimin konsideroj që është mirë dhe natyrisht ka ndihmuar”- shpjegon kryetari deri sa përmend faktin që pas këtij takimi kishte marrë një telefonatë.
Telefonata ishte nga Ministri për Komunitete dhe Kthim, Nenad Rashiq, ky i fundit i emëruar si ministër nga Kryeministri Albin Kurti në vitin 2022.
“Jo nuk jam duke e shkarkuar tani në këtë rrethanë, por atëherë më ka thirr ministri Rashiq më ka thënë të lutem kryetar nëse nuk ke marrë ndonjë vendim deri tash lema këtë çështje mua, kështu ministri Rashiq më ka thënë”- tregoi Zeqiri.
Ai u pyet nga Jeta Xharra nëse Rashiq vendos për punët komunale, ndërsa Zeqiri ia kthen se për këtë rast nga askush prej Partisë Demokratike të Kosovës në të cilën bën pjesë nuk ishte thirrur.
“Jo nuk e kam bos Rashiqin por e respektoj si ministër. Për këtë çështje as bisedë se kemi pas me kërkon të PDK-së as me të (Memli Krasniqin). Ata nuk e di sa janë të njoftuar me këto gjëra. Por kjo është gjendja dmth Gordanën e kam drejtoreshë me preferenca dhe kërkesë të ministrit Rashiq”- shtoi ai.
Sa i përket të kaluarës së Gordana Mihajloviq, Zeqiri thotë se kjo është çështje që duhet të trajtohet nga sistemi i sigurisë dhe drejtësisë.
“Ajo është cështje e policisë e organeve të hetuesisë. Jo, jo, te unë edhe me dasht nuk ka mundësi, është drejtoreshë por nuk mund të kaloj diçka pa e ditë edhe unë dhe natyrisht edhe mekanizmi jonë që e kemi një bashkëpunim është e pamundur edhe me dashtë”- tha ai.
“Nuk e di sa barnatore i ka pas. Kom dëgju masi është spekulu jo se është në hetime por është e dyshimtë, unë kam problem por ma shumë e kam problem ma tepër që unë duhet… nuk tutna me shkarku por sa i përket pozitës që është, natyrisht është organizatore edhe mirë. Nuk e di a e njohin kontrabandistat. Po nuk e di a e dinë të gjithë”- shton tutje Zeqiri.
Hulumtimi i KALLXO.com tregon rrugëtimin e partneres së kontrabandistit shqiptar në veri të Kosovës drejt pozitave zyrtare
Gordana Mihajloviq, pronarja e barnatores ‘Lilia’ në Mitrovicën e Veriut, në mars të vitit 2024 është emëruar drejtoreshë e Shëndetësisë në Komunën e Zubin Potokut ndërsa barnatorja e saj ishte cak i një bastisjeje nën dyshimet se po kryhej veprimtari ilegale, kontrabandë me mallra.
Një hetim disamujor i Doganës së Kosovës në bashkëpunim me Policinë e Kosovës si dhe Prokurorinë Speciale e atë të Mitrovicës do të shtrihej në terren në një aksion kundër kontrabandës me mallra, kryesisht me barna në disa lokacione e qytete në tetor të vitit 2021.
Një nga to ishte edhe lokacioni në Mitrovicën e Veriut. Barnatorja “Lilia” ishte identifikuar si një objekt në të cilin shiteshin barna të kontrabanduara, kryesisht nga Serbia.
KALLXO.com ka arritur që të ketë qasje në dosje të hetimit e cila e nxjerr barnatoren në pronësi të Gordana Mihajloviqit, tash e disa muaj e emëruar si drejtoreshë e Shëndetësisë në Komunën e Zubin Potokut.
Ajo është zgjedhur në këtë pozitë pas rekomandimit të cilin kryetari i Komunës Izmir Zeqiri e mori nga ministri për Komunitete dhe Kthim, Nenad Rashiq.
Ky i fundit është zgjedhur në pozitën e ministrit nga kryeministri Kurti në vitin 2022.
Gordana Mihajloviq nga një grua e cila njihej se në barnatoren e saj do të kryhej një bastisje për shkak të dyshimeve për kontrabandë me barna, sot zë vend në takime me ministra të Qeverisë Kurti.
Hulumtimi i KALLXO.com zbardh se si Gordana Mihajloviq, ish-partnerja e njërit nga njerëzit e fuqishëm në veri të vendit i njohur si bosi shqiptar i kontrabandës, Besim Zeqiri, i njohur me nofkën ‘Kaça’, arriti të marrë pozitë zyrtare dhe të takohet me ministra të Qeverisë Kurti 2.
E për dhunën që u përdor, ndaj policëve të Kosovës në aksionin e doganës së vitit 2021, në të cilin shtatë zyrtarë policorë ishin lënduar e plagosur, kishin reaguar edhe kryeministri edhe ministri i Brendshëm.
Aksioni policor ishte përcjellë në atë kohë edhe me protesta nga dhjetëra qytetarë që kishin dalë kundër këtij aksioni, që nuk po zhvillohej vetëm në Mitrovicë e Veriut.
Në incidentet që u shënuan atje në po atë ditë, ishin përdorur mjete të forta kundër policëve si dhe ishin dëgjuar të shtëna armësh e shpërthime granatash.
Pamjet që ishin transmetuar në atë kohë tregonin se si zyrtarët policorë që kishin hyrë për të kryer bastisjen në barnatoren “Lilia” tentojnë të largohen nga aty por te shkallët ballafaqohen me turmën e protestuesve të cilët hodhën gjësende të ndryshme, e mjete të forta drejtë policëve.
Pas protestave, në terren mbetën dëshmi të asaj që kishte ndodhur, mes tyre edhe plumba, shok-bomba e mjete të tjera që ishin përdorur.
Barnatorja e cila do bastisej më 13.10.2021, ishte dhe është në pronësi të Gordana Mihajloviqit, e identifikuar si partnerja e Besim Zeqirit, i njohur si ‘Kaça’, i cili është person i njohur për drejtësinë në Kosovë.
Më 13.10.2021 përveç bastisjes që kishte kryer në Mitrovicë e Veriut, Policia kishte shpallur në kërkim edhe pesë persona të dyshuar si të involvuar në këtë rast. Një ndër ta ishte edhe “Kaça”, i njohur si bosi shqiptar i kontrabandës.
Vetëm disa muaj më vonë pas arratisjes, ‘Kaça’ do të arrestohej nga Policia, do të qëndronte në paraburgim e më pas do të lirohej nga kjo masë e sigurisë.
Në vitin 2023, Komuna e Zubin Potokut ngjashëm sikurse edhe dy komunat e tjera, Leposaviq e Zveçan patën probleme për muaj me radhë pas zgjedhjes së kryetarëve të rinj shqiptarë për të udhëhequr komunat me shumicë serbe.
Kryetari i Zubin Potokut, Izmir Zeqiri, disa herë kishte thënë se mirëpret qytetarët serbë në komunën që udhëheq që të bëhen pjesë e institucioneve lokale dhe të mos i bojkotojnë ato.
Vetë Zeqiri në një bisedë përmes telefonit me KALLXO.com tregon se nuk e kishte ditur se kush ishte Gordana Mihajloviq, ndërsa tek në dy-tre muajt e fundit kishte marrë informacione për të.
“Jo, s’e kemi ditur që është gruaja e tij. Kemi marrë vesh pak ma vonë por kjo i ka sjellë letrat, dokumentacionet sepse ne sigurohemi që ajo të mos ketë probleme me ligjin. Para dy-tre muajve kemi kuptuar që është në bashkëjetesë me të”- tha Izmir Zeqiri për KALLXO.com.
Ai thotë se rekomandimin për Mihailoviqin e ka marrë nga ministri për Komunitete dhe Kthim, Nenad Rashiq.
“Por për të kemi pasur rekomandime drejtpërdrejt nga Ministria e Rashiqit, këta e kanë rekomandu. Mirëpo nuk kemi diçka për këtë, natyrisht s`mund bën asgjë, por gjithsecili që vjen ne i kërkojmë dokumentacion që nuk janë nën hetime, që nuk kanë probleme me ligjin. Në bazë të rekomandimeve dhe bashkëpunimeve që kemi pasë, ka qenë rekomandim i Ministrisë”- shton ai.
Në lidhje me këtë çështje KALLXO.com ka kontaktuar edhe me ministrin për Komunitete dhe Kthim, Nenad Rashiq, të cilin e kishte emëruar Albin Kurti në vitin 2022.
“Unë nuk e njoh Besimin. Çka ka lidhje Gordana me veprat e Besimit? Ai e pagun çmimin e për shkelje të ligjit, çka ajo duhet me bo tani? A ka bërë ndonjë shkelje të Ligjit?”- tha Rashiq përmes telefonit për KALLXO.com.
KALLXO.com ka kërkuar edhe nga Zyra e Kryeministrit sqarime nëse kanë qenë në dijeni për emrat që janë dorëzuar nga Ministria për Komunitete dhe Kthim në komunat në veri të vendit.
Deri në publikimin e këtij shkrimi, Zyra e Kryeministrit nuk ka kthyer asnjë përgjigje.
KALLXO.com më 04.11.2024 ka tentuar që të flasë edhe me drejtoreshën e Shëndetësisë në Zubin Potok, Gordana Mihajloviq, por e njëjta nuk ka pranuar takim me ekipin duke thënë se është e angazhuar me takime.
Në ARBK, partnerja e “Kaçës” ende figuron pronare e barnatores
Në Agjencinë për Regjistrimin e Bizneseve (ARBK), barnatorja “Lilia” është në pronësi të Gordana Mihajloviqit.
Aksionet e barnatores në bazë të dokumentit publik në ARBK kanë kapital prej 1 mijë eurove ndërsa aktiviteti kryesor i këtij biznesi është tregtia me shumicë e mallrave farmaceutike.
KALLXO.com më 04.11.2024 shkoi në vendin ku ishte barnatorja tre vite më parë, dhe pa që ajo ishte e mbyllur dhe e njëjta hapësirë ishte duke u rinovuar dhe rregulluar për një biznes tjetër.
Biznesi në ARBK figuron ende se është aktiv ndërsa numri i telefonit i vendosur aty është i paqasshëm dhe jashtë funksionit.
Ministria e Shëndetësisë e promovoi në rrjete sociale ish-partneren e bosit shqiptar të kontrabandës
Gjatë këtij viti, ministri i Shëndetësisë, Arben Vitia kishte marrë pjesë në një takim në të cilin ishte edhe drejtoresha e Shëndetësisë në Zubin Potok, Gordana Mihajloviq.
Me anë të disa fotografive që ishin promovuar në rrjetet sociale zyrtarë të Ministrisë së Shëndetësisë më 08.05.2024, ishte treguar se ministri Vitia ka mbajtur takim me drejtuesit e shëndetësisë në komunat në veri të vendit për të diskutuar për sfidat dhe nevojat e sistemit shëndetësor.
“Ministri i Shëndetësisë, Dr. Arben Vitia, sot priti në takim përfaqësuesit e tre komunave veriore të Republikës së Kosovës: Kryetarin e Komunës së Leposaviqit, z. Lulzim Hetimi, Nënkryetaren e Komunës së Leposaviqit, znj. Marina Bogojeviq, Drejtoreshën për Shëndetësi në Komunën e Leposaviqit, znj. Marina Zdravkoviq, Drejtoreshën për Shëndetësi në Zubin Potok, znj. Gordana Mihajloviq, si dhe profesionistët shëndetësorë nga Zveçani, znj. Valbona Kelmendi dhe z. Xhevdet Tahiri”- thuhej në postimin e Ministrisë së Shëndetësisë të datës 08.05.2024.
Kurti e Sveçla dënonin protestat ndaj aksionit kundër kontrabandës në veri
Fundi i ditës 13.10.2021, tregonte se për shkak të aksionit të Doganës e Policisë kundër kontrabandës në Mitrovicë të Veriut, në rrugët që të dërgojnë drejt Shkollës Teknike e sheshit ‘Car Llazar’, kishte mbetje të mjeteve piroteknike, shok-bombave, vetura të dëmtuara e barrikada që ishin vendosur në mes të rrugës në Lagjen e Boshnjakëve në Mitrovicën e Veriut.
Shtatë policë ishin lënduar pasi ndaj tyre u përdorën mjete të forta nga protestuesit që kundërshtonin aksionin e tetorit të 2021-tës.
Madje përveç policëve edhe ekipet e gazetarëve ishin sulmuar nga persona të ndryshëm, disa nga ta të maskuar.
Gjatë asaj dite, sulmet dhe situatën e krijuar e kishte dënuar ashpër në atë kohë edhe kryeministri Albin Kurti e edhe ministri i Brendshëm Xhelal Sveçla.
Madje ministri i Brendshëm kishte thënë më 13.10.2021 se ‘operacioni nuk është i drejtuar kundër asnjë nacionaliteti por kundër kriminelëve që kanë kontrabanduar mallra’.
“Operacioni i sotëm nuk i është drejtuar asnjë nacionaliteti apo komuniteti që jeton në Kosovë. Ai i është drejtuar kriminelëve që janë identifikuar si kontrabandues të mallrave ilegale në territorin e Republikës sonë. Kriminelët nuk ndahen në grupe etnike”- kishte shkruar Sveçla në Facebook më 13.10.2021.
Dy vite pas ngjarjes që kishte ngritur tensione në veri të vendit, Ministria për Komunitete dhe Kthim, konkretisht Nenad Rashiq, i cili është emëruar ministër nga kryeministri Albin Kurti, pretendohet se i ka propozuar Komunës së Zubin Potokut që të caktojë si drejtoreshë të Shëndetësisë, Gordana Mihajloviqin, partneren me të cilën bashkëjetonte ‘Kaça’.
Kush është Besim Zeqiri “Kaça”?
Në korrik të vitit 2023, KALLXO.com pati raportuar për arrestimin e fundit të Besim Zeqirit.
Në dosjen e Prokurorisë thuhej se “Kaça” ka 34 incidente në të kaluarën e tij kriminale, shumica prej të cilave të natyrës së kontrabandimit.
Besim Zeqiri në tetor të vitit 2021 ishte shpallur për një kohë edhe në kërkim policor, ndonëse vetëm dy muaj më herët, në gusht të 2021 ai ishte arrestuar nga Policia.
Arrestimi i radhës i “Kaçës” kishte ndodhur gati një vit pas shpalljes në kërkim, në gusht të 2022-tës.
Ai në vitin 2018 ishte arrestuar nga Policia e Kosovës për disa vepra penale pas disa vitesh të kaluara në arrati, por më pas ishte liruar.
Ai njihet edhe për qëndrimin e tij në arrati për disa vite, para se të arrestohej më 2018, por edhe kësaj radhe ai prapë ishte liruar.
“Kaça” i kishte ikur Policisë në gusht të vitit 2021, e ndjekja e tij ishte zhvilluar si në filma.
Zeqiri kishte arritur të arratisej ndërsa gjatë arratisjes një polic kishte mbetur i lënduar.
Edhe aktualisht, Besim Zeqiri është liruar nga paraburgimi pas arrestimit të fundit që kishte pasur gjatë vitit 2023.
Në një përgjigje për KALLXO.com, Gjykata e Mitrovicës ka treguar për masat e sigurisë që ka pasur ‘Kaça’ pas arrestimit në korrik të vitit 2023.
“Në lidhje me rastin e Besim Zeqiri, rasti është në shqyrtim. Masa e paraburgimit i ishte caktuar me datën 12.08.2023, kurse i është ndërprerë paraburgimi me datën 10.11.2023. Të njëjtit i është caktuar arresti shtëpiak nga data 10.11.2023 deri me datën 08.12.2023 ku më pas i është ndërprerë masa e arrestit shtëpiak dhe i njëjti mbrohet në liri dhe vazhdon procesi”- thuhej në përgjigjen e zyrës për informim të Gjykatës Themelore të Mitrovicës për KALLXO.com.
