PSD thotë se në Kuvend pati dezinformata lidhur me shqyrtimin e Projektligjit për faljen e gjobave gjatë pandemisë
Kuvendi i Kosovës e ka shtyrë shqyrtimin e Projektligjit për faljen e gjobave gjatë pandemisë me arsyetimin se PSD-ja si iniciuese e këtij projektligji nuk e ka caktuar ndonjë deputet për ta prezantuar atë.
Nol Nushi, sekretar i Partisë Socialdemokrate(PSD), lidhur me këtë, ka thënë për KALLXO.com se gjatë seancës pati dezinformata.
KALLXO.com ka kërkuar nga Nushi informacione se cilin deputet do ta caktojnë për ta prezantuar këtë projektligj. Ai ka thënë se nesër (e premte) para Kuvendit të Kosovës, do të japin sqarime lidhur më këtë çështje.
“Unë sapo e pashë seancën, dhe nëse jo sot, nesër kemi me dhon sqarim sepse pati dezinformata. Në mëngjes e bëj një video te Kuvendi ku i tregoj krejt problemet”- ka thënë Nushi për KALLXO.com.
Sot në seancën e Kuvendit, kryetari i Kuvendit, Galuk Konjufca ka thënë se Partia Socialdemokrate(PSD), si iniciues i Projektligjit për faljen e gjobave gjatë pandemisë, nuk ka caktuar ndonjë deputetë të Kuvendit të Kosovës për t’ia prezantuar këtë projektligj.
Ai ka thënë se vendimi për mënyrën e prezantimit të këtij projektligj është caktuar në mbledhje të Kryesisë.
“Në mbledhë të Kryesisë kemi marrë vendim në unanimitet, të gjitha partitë politike, që propozuesi i këtij projektligji që ka ardhur në formën e një peticioni në Kuvend, prej propozuesit ti bartet një deputeti që ata e caktojnë që ta prezantojë këtë projektligj para Kuvendit, dhe deri tash nuk kemi pasë prej organizatorit ndonjë përfaqësues që ta caktojë”-ka thënë Konjufca.
Tutje ai ka shtuar se deri në caktimin e ndonjë deputeti për prezantimin e këtij projektligji, kjo çështje mbetet të trajtohet në njërën prej seancave të ardhshme.
Në rend të ditës në seancën e sotme, ka qenë shqyrtimi në parim i Projektligjit për faljen e masave ndëshkimore të vendosura gjatë periudhës së Pandemisë COVID-19.
Projektligji është dorëzuar në Kuvend në qershor të vitit 2021, pas mbledhjes së më shumë së 11 mijë nënshkrimeve nga qytetarët e Kosovës.
Përmes nismës legjislative, në formë peticioni, Projektligji në fjalë është iniciuar në Kuvend nga Partia Social Demokrate(PSD).
Numri i gjobave të cilat parashihet të falen nëse Projektligji merr dy here votat e nevojshme, është 329 mijë gjoba.
Sipas Policisë së Kosovës, ky numër i gjobave është shqiptuar pas hyrjes në fuqi të Ligjit antiCovid.
“Që nga hyrja në fuqi të ligjit antiCovid (26.08.2020) dhe deri në qershor të këtij viti, bazuar në këtë ligj, Policia e Kosovës ka shqiptuar për mosrespektim të masave anti-Covid-19 mbi 329.000 gjoba”-thuhet në përgjigjen e Policisë për KALLXO.com.
