Prokuroria në Prizren “mbyllë gojën”, për pretendimet për falsifikime në raportin e Astrit Deharit
Mahmuti thotë se raporti u mbajt i fshehur 4 muaj nga dita e dorëzimit nga Njësia Romande e Mjekësisë Forenzike të Qendrës Universitare Normande.
Këto pretendime janë mohuar nga Prokuroria e Shtetit pasi raporti është pranuar me 17 tetor nga Ambasada e Zvicrës në Kosovë.
Bardhyl Mahmuti ka gjetur se ekspertiza është hartuar me datë me datë 14 qershor 2019 dhe kështu shkruhet në raportin në gjuhen frënge, ndërsa në përkthimin në gjuhën shqipe kjo datë është ndryshuar për t`u shkruar me 14 shtator.
KALLXO.com, gjatë ditës së sotme ka provuar të kontaktojë përmes telefonit me kryeprokurorin e Prokurorisë Themelore në Prizren, Admir Shala, por i njëjti ka qenë i paqasshëm.
Ndërsa, përmes emailit, kjo Prokurori nuk ka dashur të komentojë pretendimet e Mahmutit për falsifikim gjatë përkthimit të raportit të vdekjes së Astrit Deharit.
“Lidhur me rastin, të cilit ju i referoheni, ju njoftojmë se Prokuroria Themelore në Prizren është deklaruar publikisht përmes konferencës për media me rastin e pranimit të Raportit të ekspertizës për rastin e Astrit Deharit”- thuhet në përgjigjen e Prokurorisë.
Mahmuti po pretendon se raporti u fsheh nga dikush në Prokurorinë e Prizrenit.
Sipas tij, përkthimi që iu dha familjes Dehari dhe që u publikua në media përbën shembull të rëndë të falsifikimit dhe shtrembërimit të ekspertizës së ekipit mjekoligjor zviceran me qëllim të fshehjes së krimit.
Prandaj, ai ka kërkuar nga Kryeprokurori i Shtetit, Aleksandër Lumezi dhe u. d. Kryeprokurori i Prokurorisë Speciale, Afrim Shefkiu, të fillojnë hetimet e menjëhershme dhe të merren masa ndaj autorëve të këtij falsifikimi.
KALLXO.com ka kërkuar një përgjigje nga Prokuroria edhe në lidhje me datën e pranimit të këtij raporti nga Instituti i Mjekësisë Ligjore në Lozanë të Zvicrës, por të njëjtit përgjegjësinë e kanë lënë në Prokurorinë Speciale e cila ka marrë hetimin e rastit të Astrit Deharit.
“Sa i përket pyetjeve tjera, jeni të lutur që t’i drejtoheni Prokurorisë Speciale të Republikës së Kosovës pasi që rasti i Astrit Deharit, ka kaluar nën juridiksion të kësaj Prokurorie”- thuhet në përgjigjen e Prokurorisë në Prizren.
Kjo është letra e plotë e Bardhyl Mahmutit: Prokurorit të Shtetit, z. Aleksandër Lumezi, Ushtruesit të Detyrës së Kryeprokurorit të Prokurorisë Speciale të Kosovës, z. Afrim Shefkiu
KËRKESË PUBLIKE PËR PËRGJEGJËSI PENALE PËR FLASIFIKIM ME QËLLIM TË FSHEHJES SË KRIMIT
Raporti i ekspertizës zvicerane për rastin “Astrit Dehari” u mbajt i fshehur 4 muaj. Me kërkesë të Metush Birajt, prokuror i Republikës së Kosovës i ngarkuar për rastin Astrit Dehari”, Njësia Romande[1] e Mjekësisë Forenzike të Qendrës Universitare Ramande të mjekësisë ligjore në Lozanë (Lausanne) të Zvicrës bëri ekspertizën e të dhënave lidhur me vdekjen e Astrit Deharit.
Në bazë të ekspertizës që u është bërë materialeve të dorëzuara nga Prokuroria Themelore e Prizrenit, materiale që numërohen në faqen 1 dhe 2 të raportit të këtij instituti, Njësia Romande e Mjekësisë Forenzike të Qendrës Universitare Ramande të mjekësisë ligjore në Lozanë MË DATË 14 QERSHOR 2019 dorëzoi ekspertizën prej 45 faqesh me numër reference: EI180001 TF/SG/jb, V/ref. PPN/I nr. 461/16.RAPORTI I EKSPERTIZËS I DATËS 19 QERSHOR 2019 U FSHEH 4 MUAJ NGA DIKUSH NË PROKURORINË THEMELORE TË PRIZRENIT.
As familja, as avokati i palës civile dhe as opinioni publik që ka ndjekur me shqetësim zhvillimet lidhur më këtë çështje nuk u vu në dijeni të përmbajtjes së këtij raporti. Rreth 3 muaj më vonë, më 9 SHTATOR 2019, instituti i lartpërmendur i qendrës universitare të Zvicrës dorëzoi ekspertizën shtesë prej 14 faqesh, me numër reference: EI190001 TF/SG/jb, V/ref. PPN/I nr. 461/16.
Skandali rreth kësaj ekspertize shpërtheu më 18 tetor 2019 kur Prokuroria Themelore e Prizrenit refuzoi t’u jepte një kopje të këtij raporti prindërve të Astrit Deharit, duke u arsyetuar sekëtë material e kanë dërguar për ta përkthyer.
Falë hapësirës së madhe që i dhanë mediat kësaj çështje, Prokuroria Themelore e Prizrenit u detyrua që, më 24 tetor 2019, t’i dorëzojë familjes Dehari një kopje në gjuhën frënge të dy raporteve dhe përkthimin e tyre në gjuhën shqipe.
Përkthimi në gjuhën shqipe që iu dha familjes dhe që u publikua nga shumica e medieve elektronike në Kosovë përbën një shembull të rëndë të falsifikimit dhe të shtrembërimit të ekspertizës së ekipit mjeko-ligjor zviceran me qëllim fshehjen e krimit.
Në ditët në vijim do të trajtoj publikisht falsifikimet që janë bërë në përmbajtjen e kësaj ekspertize.
Sot do të kufizohem vetëm në aspektin e falsifikimit që kishte për qëllim të fshehë fshehjen 4-mujore të ekspertizës zvicerane.
Në përkthimin në gjuhën shqipe ËSHTË NDRYSHUAR DATA E KËTIJ RAPORTI. Në vend të datës 14 QERSHOR 2019 është shënuar data 14 SHTATOR 2019.
Në rastet kur muajt shënohen me numra, shtypja gabimisht e një numri është gabim teknik njerëzor i mundshëm. Mirëpo, në rastet kur muajt shënohen me shkronja, mundësia e gabimeve të tilla nuk ekziston: Vetëm qëllimisht mund të shkruhet “SHTATOR” në vend të “QERSHOR”.
Nuk ka asnjë dyshim se ky falsifikim është bërë me qëllim të fshehjes se përse kjo ekspertizë u mbajt e fshehur 4 muaj.
Vendimi i Kryeprokurorit të Shtetit, Aleksandër Lumezi, që rasti “Astrit Dehari”, të kalojë nga Prokuroria Themelore në Prizren në juridiksion të Prokurorisë Speciale të Republikës së Kosovës është një vendim për t’u përshëndetur.
Sidomos është për t’u përshëndetur angazhimi publik se Prokurori i Shtetit do “t’i shfrytëzojë kompetencat dhe autorizimet kushtetuese dhe ligjore, që të zhvillohen hetime të pavarura, profesionale dhe kredibile në ndriçimin e plotë të këtij rasti”.
Ftoj publikisht Prokurorin e Shtetit, z. Aleksandër Lumezi dhe Ushtruesin e Detyrës së Kryeprokurorit të Prokurorisë Speciale të Kosovës, z. Afrim Shefkiu që në përputhje me kompetencat dhe autorizimet kushtetuese dhe ligjore të fillojnë hetimet e menjëhershme dhe të merren masat e parapara me ligj për autorët e këtij falsifikimi.
Bardhyl Mahmuti: Raporti zviceran për Astrit Deharin u mbajt i fshehur për 4 muaj
.
