Projekti i ri i 'NewBorn', ftohen qytetarët të lënë gjurmë me duart e tyre

Sikurse në çdo përvjetor, edhe në përvjetorin e 13-të të Pavarësisë së Kosovës, monumenti i ‘NewBorn’ do të pësojë ndryshime.

Autori i monumentit, Fisnik Ismajli përmes një postimi në Facebook ka treguar se cila do të jetë simbolika e ‘NewBorn’ përgjatë një viti.

Ai ka ftuar qytetarët që nesër, më 14 shkurt, të shkojnë te monumenti ta ngjyrosin dorën dhe të lënë gjurmën e shuplakës së tyre në monument.

Në 12 vjetorin e pavarësisë, New Born u ishte dedikuar viktimave të dhunës seksuale gjatë luftës së fundit në Kosovë.

Lexo postimin e plotë të Fisnik Ismailit:

Në një kohë kur po na cenohet dinjiteti dhe lufta e pastër si asnjëherë më parë, është momenti i fundit që të bëhemi të gjithë bashkë dhe t’i tregojmë botës se paqen e prumë të gjithë ne, me shumë sakrificë.

Ishte lufta ajo që i ndryshoi të gjitha, që ne sot të jetojmë të lirë. E paguam dikur me çmim të shtrenjtë, prandaj sot e konsiderojmë të shenjtë.

Sivjet duhet të bëhemi të gjithë prapë bashkë, t’i tregojmë botës, sikur në ditën kur u shpall pavarësia kur të gjithë e lamë nga një shenjë, se jemi të njëzëshëm për sakrificën dhe flijimin e të gjithë atyre që dhanë jetën, që ne të jetojmë në paqe.

Prandaj, nga nesër i ftojmë të gjithë qytetarët që në ditën e dashurisë, më 14 shkurt, që koincidon me ditën e zgjedhjeve, pasi të kenë votuar, që të dalin para monumentit NEWBORN dhe t’a ngjyrosin shuplakën me njërën nga ngjyrat e ushtrisë dhe ta vendosin në monument.

Ky proces pastaj do të vazhdojë edhe të hënën e martën më datat 15 dhe 16, ku do të dalim që t’ua mundësojmë qytetarëve të ngjyrosin shuplakët dhe t’i vendosin në monument, si shenjë respekti, dashurie dhe përkrahje për luftën tonë, që në fund Monumenti NEËBORN të ketë pamje të uniformës së ushtrisë, të krijuar nga duart e vetë qytetarëve.