Problemet teknike pamundësojnë mbajtjen e gjykimit ndaj ish- kryeshefit të KPM-së, Luan Latifi
Seanca e paraparë të mbahej sot ndaj ish-kryeshefit të Komisionit të Pavarur të Mediave (KPM), Luan Latifit, i akuzuar për marrje ryshfeti, nuk është mbajtur.
Arsyeja për mosmbajtjen e kësaj seance ishin problemet teknike me pajisje të gjykatës, ku sot pritej që të administroheshin prova duke u bërë dëgjimi i tyre me audio.
“Kemi pengesa teknike në vazhdimin e këtij shqyrtimi gjyqësor, pasi që zyrtari i IT-së edhe pse kanë qenë të njoftuar nga shqyrtimi i kaluar që sot do të mbahet shqyrtimi në këtë sallë dhe na nevojiten pajisjet për dëgjim, zyrtari i IT-se Leart Veliu, tani na tregoi se nuk mund te dëgjojmë audion për arsye se një zyrtar tjetër i ka largu pajisjet nga salla, kështu që na bën të pamundur të vazhdohet me këtë shqyrtim gjyqësor”- tha kryetari i trupit gjykues.
Seanca e radhës për këtë rast u caktua të mbahet më datën 3 maj të këtij viti.
Kujtojmë se Luan Latifit i ishte shqiptuar masa e paraburgimit për 30 ditësh, e pas përfundimit të kësaj mase i është caktuar arrest shtëpiak për dy muaj, masë kjo që nuk i është vazhduar më tutje.
Për këtë rast i akuzuar ka qenë edhe Arben Bilalli, ish-drejtor i Administratës dhe Financave në Komisionin e Pavarur të Mediave. Ai është gjetur fajtor për vepër penale, marrja e ryshfetit dhe është dënuar me 140 ditë burgim dhe 12 mijë euro gjobë.
Bilalli kishte pranuar fajësinë ndërsa Latifi ishte deklaruar i pafajshëm, pastaj ishte veçuar procedura ndaj Bilallit.
Gjykata i ka shqiptuar Bilallit edhe dënimin plotësues, ndalimin e ushtrimit të funksioneve publike, në administratës publike ose shërbimin publik në kohëzgjatje prej 3 vite.
Sipas aktakuzës Latifi në cilësinë e kryeshefit të Komisionit të Pavarur për Media dhe Arben Bilalli, si drejtor i Administratës dhe Financave në KPM, kanë kërkuar dhe marrë ryshfet shumën prej 8 mijë euro nga i dëmtuari Elhami Haziri, pronar i kompanisë “TelKos”.
Dosja e prokurorisë tregon se si ryshfeti ishte pranuar nga ana e të akuzuarve me qëllim që kompanisë “TelKos”, të mos i shqiptohet gjobë për shkak se ajo kishte bërë shkelje ligjore duke bërë shtrirje të rrjetit në disa vende për të cilat nuk e kishte njoftuar KPM-në.
Sipas aktakuzës, Bilalli më 24 qershor 2021, ishte takuar në zyrën e tij me pronarët e kësaj kompanie, Elhami Haziri, Enver Berisha dhe Ymer Kurtolli, të cilëve iu kishte kërkuar 20 mijë euro ryshfet, duke deklaruar se këtë shumë të parave po e kërkonte i akuzuari Latifi.
Ndërsa, pasi i dëmtuari Haziri i kishte thënë që nuk e kishte këtë shumë, të njëjtit kishin arritur të merren vesh që për fillim të japin 10 mijë euro, ku në atë moment, i akuzuari Bilalli sipas prokurorisë i kishte shkruar të akuzuari Latifi “nuk po lëshon veç 10”, dhe më pas më 29 qershor 2021, i akuzuari Bilalli ishte takuar me të dëmtuarin Haziri.
Sipas prokurorisë, të dy ishin takuar në restorant “Garden”, në Gjilan, dhe pasi i dëmtuari Haziri i kishte dhënë 8 mijë euro, kishte kërkuar nga i akuzuari Bilalli të kontaktojë të akuzuarin Latifi për t`u bindur se ky i fundit e kishte marrë vesh se paratë janë dhënë.
Prokuroria tutje pretendon se duke u zbatuar masat e fshehta dhe nën vëzhgim të policisë, i akuzuari Bilalli në prezencë të të dëmtuarit Haziri i kishte telefonuar të akuzuarit Latifi duke i thënë “kreva punë dhe tash po eci”.
Sipas aktakuzës, Bilalli shumën prej 8 mijë euro e kishte pranuar në një zarf dhe ishte nisur në drejtim të Prishtinës, ku rrugës ishte ndaluar nga policia të cilët ia kishin gjetur shumën prej 8 mijë euro.
Raportimet e KALLXO.com lidhur me këtë rast mund ti lexoni duke klikuar në LINK
