Problemet me uebfaqen, deklarohen nga KQZ
Zëdhënësi i Komisionit Qendror Zgjedhor, Valmir Elezi ka thënë se për shkak të interesimit të madh të qytetarëve për t’u qasur në platformën e rezultateve, është shkaktuar mbingarkesë në sistem.
“Të gjitha ekipet e KQZ-së janë duke punuar në terren dhe duke dërguar të dhënat të cilat po bëjmë përpjekje që t’i transmetojmë në kohë sa më të shpejtë”- tha Elezi për KALLXO.com.
Ai tha se KQZ është duke mbledhur të dhënat pas numërimit të fletëvotimeve nga vendvotimet. Janë evidente probelemet teknike në platformë.
“Të dhënat janë duke u mbledhur nga terreni dhe më pas do të publikohen nga KQZ”- shtoi ai.
Komisioni Qendror Zgjedhor (KQZ) ia ka huqur me përditësimin e të dhënave për qytetin e Pejës.
Në të dhënat e KQZ-së për qytetin e Pejës, figuron që Lëvizja Vetëvendosje ka marrë 96.44% të votave, nga 16.67% të votave të numëruara.
Kjo përqindje, në numër, sipas të dhënave të KQZ-së ishin 113,371 vota. Të njëjtat rezultate menjëherë kanë filluar të shpërndahen në TikTok e rrjetet tjera sociale.
Ndërsa, të dhënat e KQZ-së për pjesëmarrjen në votime, në Pejë kishin marrë pjesë 41,009 persona.
Kjo konstaton se ka të dhënat e vendosura në ueb-faqen e KQZ-së nuk ka mundësi të jenë të sakta.
Deri më tani nuk ka pasë ndonjë reagim nga KQZ në lidhje me këtë cështje.
Momentalisht, faqja e KQZ-së është jashtë funksionit.
Sipas KQZ-së, rezultatet preliminare nuk përfshijnë votat me kusht, votat e personave me nevoja të veçanta dhe votat jashtë Kosovës.
Zgjedhjet e vitit 2025 për Kuvend të Kosovës janë zgjedhjet e gjashta me radhë që u mbajtën që nga shpallja e pavarësisë së Kosovës më 17.02.2008.
Huqja e KQZ-së me rezultatet preliminare në Pejë, 96.44 për qind të votave ia vendos LVV-së
