Prizrenasi që punon në Zvicër kultivon aroninë në vendlindje

Dikur i përdorur vetëm si ngjyrues pijesh, tashmë aronia po kultivohet çdo ditë e më shumë në Kosovë si fryt i rrallë e me shumë të mira shëndetësore.

Aronia rrit imunitetin dhe vitaminën C si dhe ndihmon uljen e rrezikut për kancer, sëmundje të zemrës, inflamacion, diabet, infeksione bakteriale dhe sëmundje neurologjike te njerëzit.

Derisa aronia mund të kultivohet në të gjitha regjionet e Kosovës, kultivuesi Esat Berisha nga Prizreni ka të mbjella 4 hektarë.

Berisha, i cili jeton dhe vepron në Zvicër, ka vendosur ta kultivojë aroninë në pronën e tij në Prizren dhe të punësojë punëtorë sezonalë për vjelje.

“Ne në Zvicër i kemi punët tona, por duke e parë që në Kosovë ka mundësia me i kultivu fushat tona, e kam pa që aronia është një fryt i dobishëm, për atë kemi vendosë që me kultivu një fryt që është i rrallë në Kosovë”, thotë Berisha.

Ai shton se në të ardhmen planifikon që ta rrisë sipërfaqen me aroni dhe të kultivojë sasi më të mëdha se aktualisht.

“Aroniat që po i shohim në plantazhin tonë tash janë në vitin e tretë, mbjellja bëhet me fidanë dhe çdo vit shtohen. Jetëgjatësia e frytit është 30-50 vjet dhe varësisht prej ambientit. Për momentin i kam dy punëtorë të rregullt dhe varet sezona prej sezonës, ne marrim deri në 25 punëtorë sidomos në vjelje, atëherë na duhen më tepër”, thotë ai.

Por, Berisha ndonëse mbjellë 4 hektarë dhe punëson disa qytetarë prizrenas, thotë se nuk ka pasur asnjëherë mbështetje as nga Komuna e Prizrenit dhe as nga Ministria.

“Deri më tash, prej komunës e as prej Republikës së Kosovës aspak ndihmë. Jemi mundu me gjetë burime se si të marrim ndihmën prej shtetit apo prej komunës sonë dhe deri më tash nuk kemi pas qasje e as nuk na kanë ndihmuar”, thotë ai.

Tutje Berisha ka treguar se së fundmi është takuar me zyrtarë të drejtorisë komunale të Bujqësisë dhe ka marrë premtime për mbështetje në mënyrë që të rrisë prodhimin.

“Fati im është që kam takuar në komunën tonë, në Drejtorinë e Bujqësisë dhe mbes me shpresën se ata janë duke punuar në këtë drejtim me ma sjell mu ndihmën dhe nëse kisha pas vetëm pak mbështetje unë kisha pas mundësi me u zgjeru më shumë. Kuptohet është interesi im, por është edhe i Komunës tonë dhe i njerëzve që do të punësohen”, thotë ai.

Sipas Ministrisë së Bujqësisë, gjatë vitit 2019 janë mbjellë 88 hektarë dhe kultivuar 666 tonë ndërsa aroni si pemë e imët ka filluar të përkrahet nga kjo Ministri përmes Programit të Pagesave Direkte (Subvencioneve) me vlerë prej 400 euro për hektar që nga viti 2016.