Prishtinë, fondi 5 milionësh për biznese nis zbatimin nga e hëna

Komuna e Prishtinës ka njoftuar se nga e hëna do fillojë zbatimi i fondit prej 5 milionë eurove për biznese.

Në njoftim thuhet se çdo biznes me qarkullim deri në 50.000 mijë euro në vit, që ka pësuar humbje gjatë pandemisë do mund të aplikojë për grante.

“Fondi i bizneseve prej 5 milion eurosh do të filloj zbatimin prej të hënës me 23 nëntor. Çdo biznes i cili ka qarkullim deri në 50,000 euro në vit e që ka pësuar humbje nga pandemia do të mund të aplikojë për ndihmë në formë granti nga Komuna e Prishtinës.

Aplikimi është i thjeshtë, do të jetë online dhe do të jetë i hapur për 10 ditë. Komuna e Prishtinës ka shumë biznese dhe ky fond mund të jetë vetëm një copëz e vogël e humbjes por Prishtina me të gjitha kapacitetet do të ndihmojë të gjithë ata që kanë nevojë, me shpresën që së shpejti do të kemi pako të tjera nga shteti. Ndihma është e targetuar dhe është për bizneset e vogla,” thuhet në njoftim.

Komuna gjithashtu njofton se në momentin që aplikoni, sistemi do të bëjë lidhjen me të dhënat e Administratës Tatimore, për ta lehtësuar edhe formularin në mënyrë që mos të humbet kohë në mbushjen e të dhënave. Qëllimi i grantit nuk është luftimi i joformalitetit, prandaj nuk kërkojmë dëshmi të tatimeve të paguara e punëtorëve të regjistruar.

Tutje sipas komunës, veprimtaria e biznesit që aplikon duhet të jetë në listën e veprimtarive të ndaluara gjatë këtij viti apo në veprimtaritë që indirekt janë prekur negativisht nga mbyllja. Ndarja e fondeve do të jetë transparente, dhe meqenëse aplikimi është online, procesi mund të monitorohet nga organet e Komunës, Ekzekutivi dhe Kuvendi Komunal në çdo kohë.