Prishtinë, avokati tenton të fusë para në Qendrën e Paraburgimit
Shërbimi Korrektues i Kosovës ka njoftuar se sot është parandaluar kontrabandimi i parave në Qendrën e Paraburgimit në Prishtinë.
Sipas njoftimit, kontrabandimi është tentuar të kryhet nga avokati A.B.
Tutje në njoftim thuhet se në xhepin e palltos së avokatit ishin të paketuara dhe të lidhura me lidhëse prej llastiku një sasi të konsiderueshme të parave (euro), për të cilat dyshohet se tentonte t`i fuste brenda Qendrës.
Futja e parave brenda Qendrës së Paraburgimit është parandaluar nga zyrtarët e kontrollit në portën hyrëse.
Rasti ka ndodhur rreth orës 15:00.
Tutje thuhet se pas gjetjes së këtyre parave ka reaguar edhe stafi përgjegjës për siguri, i cili ka lokalizuar provat materiale.
Po ashtu lidhur me këtë ngjarje është njoftuar Policia e Kosovës dhe Oda e Avokatëve, thuhet në njoftim.